AZƏRBAYCAN PREZİDENTİ İLHAM ƏLİYEV BAKIDA “ANKARA MƏKTƏBİ” MƏKTƏB-LİSEYİ İLƏ TANIŞ OLMUŞDUR
Azərbaycan Prezidenti İlham Əliyev sentyabrın 15-də Bakının Nərimanov rayonunda yerləşən “Ankara məktəbi” məktəb-liseyi ilə tanış olmuşdur. Məktəblilər dövlətimizin başçısını və xanımını gül-çiçəklə qarşıladılar.
Prezident İlham Əliyev xalqımızın ümummilli lideri Heydər Əliyevin məktəbin birinci mərtəbəsində qoyulmuş büstü qarşısında keşik çəkən “Gənc heydərçiləri” salamladı. Dövlətimizin başçısı və xanımı büstün önünə gül dəstələri qoydular.
Təhsil naziri Misir Mərdanov respublikamızın rəhbərinə məlumat verərək dedi ki, ötən ilədək 77 nömrəli orta məktəb kimi fəaliyyət göstərən bu təhsil ocağı iki ay bundan əvvəl Nazirlər Kabinetinin qərarı ilə Təhsil Nazirliyinin tabeliyinə keçmişdir. Bina tam əsaslı təmir edilmiş, müasir avadanlıqla təchiz olunmuşdur. Burada 1400-dən çox şagird təhsil alır, 100-dən çox müəllim çalışır. “Ankara məktəbi” adlansa da, sırf Azərbaycan məktəbi kimi fəaliyyət göstərəcək, tədris prosesi ölkəmizin proqramları əsasında aparılacaqdır. Məktəbdə iki kompyuter otağı, akt və idman salonları, 30-dan çox sinif otağı və digər yardımçı otaqlar vardır. Dərslər Azərbaycan və rus bölmələri üzrə iki növbədə keçiriləcəkdir. Məktəbdə ulu öndər Heydər Əliyevin, Prezident İlham Əliyevin fəaliyyətləri, Azərbaycanın dövlət dili və hərb sənəti ilə bağlı xüsusi guşələr yaradılmışdır.
Prezident İlham Əliyev gənclərin çağırışaqədərki hazırlığı, informasiya texnologiyası və informatika kabinetlərini, ayrı-ayrı sinif otaqlarını gəzdi, tədris prosesi, dərs vəsaitləri ilə maraqlandı.
Bildirildi ki, yüksək tədris bazasına malik məktəb dərs vəsaitləri ilə tam təmin olunmuşdur. Bu il yüksək bal toplayaraq ali məktəblərə qəbul olunmuş və Prezident təqaüdünə layiq görülmüş tələbələr arasında bu təhsil ocağının məzunları da var.
Prezident İlham Əliyev müasir təlim texnologiyaları kabinetində qədim Azıx mağarasına aid videokadrlara tamaşa etdi. Bildirildi ki, yeni metodlardan istifadə etməklə tarixə dair materialların şagirdlərə öyrədilməsi çox səmərəlidir. Bu cür layihələr Avropa ölkələrində tətbiq olunur.
Dövlətimizin başçısı Azərbaycanda orta məktəblərin kompyuterləşdirilməsi proqramının başa çatdırılmasının, internetə qoşulmasının, ölkəmizin bütün bölgələrində yeni müasir təhsil ocaqlarının tikilməsinin, şagirdlərin yüksək bilik alması üçün hər cür şərait yaradılmasının vacibliyini vurğuladı. Uşaqların yaxşı oxuması, biliyə yiyələnməsi, vətənpərvərlik ruhunda tərbiyə alması üçün daha səylə çalışmağı tövsiyə etdi.
Müəllimlər Mehriban xanımın rəhbərlik etdyi Heydər Əliyev Fondunun fəaliyyətini yüksək qiymətləndirdilər, ulu öndərin tarixi xidmətlərini, təhsilə göstərdiyi diqqət və qayğını xatırlatdılar, dövlətimizin başçısının tövsiyələrinin yerinə yetirilməsi üçün əzmlə çalışacaqlarını bildirdilər.
Sonra Azərbaycan Prezidenti türk dünyasının böyük oğulları Heydər Əliyevin və Mustafa Kamal Atatürkün fotoşəkilləri də olan “Bir millət, iki dövlət” guşəsinə maraqla baxdı və məktəbin fəxri qonaqlar kitabına ürək sözlərini yazdı:
“Ankara məktəbi” təmirdən sonra yeni görkəm alıb. Müəllimlərin iş şərati yaxşılaşıb, uşaqlar üçün, yaxşı oxumaq üçün gözəl imkanlar yaradılıb.
Azərbaycanda son illər ərzində məktəb tikintisi və təmiri geniş vüsət alıb. Təhsil sisteminin maddi-texniki bazası möhkəmlənir, tədris prosesində yeniliklər müşahidə olunur.
Məktəbin bütün kollektivinə uğurlar arzulayıram.
İlham Əliyev
Azərbaycan Respublikasının Prezidenti,
15.09.2006.
Bölmənin digər xəbərləri
