AZƏRBAYCAN PREZİDENTİ İLHAM ƏLİYEV YAPONİYANIN ÖLKƏMİZDƏKİ SƏFİRİNİ QƏBUL ETMİŞDİR
Azərbaycan-Yaponiya əlaqələrinin bütün sahələrdə sürətlə inkişaf etdiyini bildirən dövlətimizin başçısı ölkələrimizin əməkdaşlığının daha da möhkəmlənməsində cənab Toşiyuki Fucivaranın fəaliyyətini yüksək qiymətləndirdi.
Azərbaycanda bir sıra iqtisadi layihələrin həyata keçirilməsində Yaponiya səfirinin xidmətlərini xüsusi qeyd edən dövlətimizin başçısı diplomatın Azərbaycandakı xeyriyyəçilik fəaliyyətinin də böyük əhəmiyyət daşıdığını vurğuladı.
Prezident İlham Əliyev əmin olduğunu bildirdi ki, diplomatik fəaliyyətini başa çatdıran Toşiyuki Fucivara gələcəkdə Yaponiyada işləyəcəyi dövrdə də Azərbaycanla dostluq münasibətlərini davam etdirəcəkdir.
Dövlətimizin başçısı Azərbaycan ilə Yaponiya arasında dostluq və əməkdaşlıq əlaqələrinin inkişafında xidmətlərinə görə cənab Toşiyuki Fucivaranı Azərbaycanın yüksək mükafatı olan “Şöhrət” ordeni ilə təltif etdiyini bildirdi və ordeni ona təqdim etdi.
Səmimi sözlərə görə dərin minnətdarlığını bildirən səfir Azərbaycan ilə Yaponiya arasında əlaqələrin əsasının Azərbaycan xalqının ümummilli lideri Heydər Əliyev tərəfindən qoyulduğunu xüsusi vurğuladı. Vaxtilə Yaponiya Xarici İşlər Nazirliyində işləyərkən cənab İlham Əliyevlə görüşünü məmnunluqla xatırlayan Toşiyuki Fucivara dedi ki, mən həmin dövrdə Azərbaycanla diplomatik əlaqələrin qurulması üzrə Yaponiya hökuməti tərəfindən təşkil edilmiş komissiyanın üzvü idim. O zaman hökumət komissiyası belə bir yekdil rəyə gəldi ki, Azərbaycanın ümummilli lideri Heydər Əliyev Yaponiyaya rəsmi səfərə dəvət olunsun. Prezident Heydər Əliyevin həmin rəsmi səfəri Azərbaycan ilə Yaponiya arasında müasir əlaqələrin başlanğıcını qoydu.
Səfir ölkəmizdə işlədiyi dövrdə Azərbaycan rəhbərliyinin, xüsusilə Prezident İlham Əliyevin ona göstərdiyi diqqət və qayğıya görə dərin minnətdarlığını bildirdi. O dedi ki, Prezident İlham Əliyev Azərbaycanın ümummilli lideri Heydər Əliyevin həyata keçirdiyi siyasəti uğurla davam etdirir. Cənab Toşiyuki Fucivara Azərbaycan-Yaponiya əlaqələrinin durmadan inkişafından da məmnunluqla söhbət açdı.
Diplomat Azərbaycanın yüksək mükafatı olan “Şöhrət” ordeninə layiq görülməsini özü üçün böyük şərəf saydığını və bundan çox böyük qürur duyduğunu söylədi, təltifə görə Prezident İlham Əliyevə dərin təşəkkürünü və minnətdarlığını bildirdi.
Bölmənin digər xəbərləri
