AZƏRBAYCAN RESPUBLİKASININ BAŞ NAZİRİ,YENİ AZƏRBAYCAN PARTİYASI SƏDRININ BİRİNCİ MÜAVİNİ CƏNAB İLHAM ƏLİYEVƏ
Azərbaycan Respublikasının Prezidenti seçilməyiniz münasibətilə Yeni Azərbaycan Partiyasının çoxminli üzvləri adından Sizi təbrik edir, müstəqil dövlətimizin qurucusu və banisi, ümummilli liderimiz, əbədi Prezidentimiz möhtərəm Heydər Əliyevin müəyyənləşdirdiyi siyasi xəttin uğurla və ardıcıllıqla davam etdirilməsi yolunda Sizə yeni-yeni zəfərlər arzulayırıq.
Ölkəmizdə yeni – XXI əsrdə azad, demokratik, şəffaf və ədalətli şəraitdə keçirilən prezident seçkilərində Sizin parlaq qələbəniz xalqımızın Heydər Əliyev yoluna sadiqliyini bir daha əyani şəkildə təsdiq etdi. Respublikamızda həyata keçirilən sosial-iqtisadi islahatlar, əldə edilmiş ictimai-siyasi sabitlik və inkişaf yolu qədirbilən xalqımız tərəfindən növbəti dəfə öz yüksək qiymətini aldı.
Möhtərəm Heydər Əliyevin rəhbərliyi dövründə Azərbaycanda qlobal miqyaslı, çoxşaxəli islahatlar prosesi geniş vüsət almış və ictimai həyatın bütün sahələrində tərəqqiyə nail olunmuşdur. Ötən on il ərzində ölkəmizdə müstəqil, demokratik, hüquqi dövlət quruculuğu möhkəmləndirilmiş, respublikamız dinamik inkişaf edən iqtisadiyyata qovuşmuş, Azərbaycanın beynəlxalq nüfuzu durmadan yüksəlmişdir. İndi əsas məsələ əldə edilən bütün bu nailiyyətlərin qorunması və daha da inkişaf etdirilməsidir. Cənab Heydər Əliyev tərəfindən həyata keçirilən siyasi xəttin ardıcıllığının təmin edilməsi tarixi zərurətdir. Xalqımızın böyük əksəriyyəti məhz Heydər Əliyev siyasi xəttinin davam etdirilməsini ümummilli maraqlara uyğun hesab edir.
Hörmətli İlham Əliyev!
Azərbaycan xalqı Sizə Heydər Əliyev siyasi xəttinin layiqli davamçısı kimi yüksək etimad göstərmişdir. Sizin 15 oktyabr 2003-cü il prezident seçkilərindəki parlaq qələbəniz buna əyani sübutdur. Seçkilərdəki uğurunuz həm də Sizin şəxsi keyfiyyətlərinizin və liderlik xüsusiyyətlərinizin məntiqi nəticəsidir. Siz daim təşəbbüskarlığınız, qətiyyətiniz, yüksək intellektiniz və praqmatik zəmin üzərində qurulmuş fəaliyyətinizlə Heydər Əliyevin siyasi varisi olmağa ən layiqli namizəd olduğunuzu sübut etmisiniz. Siz, rəhbərlik etdiyiniz bütün sahələrdə ardıcıl olaraq yüksək nailiyyətlərə imza atmış, doğma Vətənimizin və xalqımızın haqlı qürur mənbəyinə çevrilmisiniz. Xalqımız qəti əmindir ki, möhtərəm Prezidentimiz Heydər Əliyev tərəfindən təməli qoyulan, realist əsaslara söykənən daxili və xarici siyasətin, sosial-iqtisadi rifahın və ümumi siyasi kursun davam etdirilməsi ölkəmiz üçün taleyüklü əhəmiyyət daşıyır və bu varisliyi Heydər Əliyev ideyalarının ən layiqli davamçısı kimi yalnız Siz təmin edə bilərsiniz. Möhtərəm Heydər Əliyev Azərbaycan xalqına 1 oktyabr 2003-cü il tarixli müraciətində qeyd etmişdir: «Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək, Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək».
Heydər Əliyevin parlaq ideyalarını fəaliyyət proqramı kimi rəhbər tutan Yeni Azərbaycan Partiyasının çoxminli üzvləri Azərbaycanın tərəqqi yolu olan Heydər Əliyev siyasətinin ardıcıl surətdə davam etdirilməsi istiqamətində Sizin ən yaxın köməkçiləriniz olacaqdır. Partiyamız bəyan edir ki, Heydər Əliyev siyasi xəttinin davam etdirilməsi naminə bütün potensialını səfərbər edəcək, xalqımızın bu ideyalar ətrafında sıx birliyini qoruyacaq və daha da möhkəmləndirəcəkdir.
Yeni Azərbaycan Partiyasının Siyasi Şurası prezident seçkilərində qazandığınız parlaq qələbə münasibətilə Sizi bir daha səmimi qəlbdən təbrik edir, qarşıda duran məsuliyyətli və şərəfli fəaliyyətinizdə Sizə yeni-yeni uğurlar arzulayır.
Yeni Azərbaycan Partiyasının
Siyasi Şurası.
Bölmənin digər xəbərləri
