Bakı, 11 noyabr (AZƏRTAC). Noyabrın 9-da ABŞ-ın Hyuston şəhərində fəaliyyət göstərən Azərbaycan Mərkəzində Dövlət Bayrağı Günü münasibəti ilə təntənəli ziyafət keçirilmişdir.

Azərbaycanın ABŞ-dakı səfirliyindən AZƏRTAC-a bildirmişlər ki, ziyafətdə ABŞ-ın çoxsaylı nüfuzlu siyasətçiləri, biznes dairələrinin nümayəndələri və ictimai xadimlər iştirak etmişlər. Tədbir iştirakçıları arasında səfir Elin Süleymanov, Azərbaycan Dövlət Neft Şirkətinin vitse-prezidenti Xalik Məmmədov, ABŞ Konqresinin üzvləri Stiv Stokman, Al Qrin və Şeyla Cəkson Li, Texaş ştatının senatoru Rodni Ellis, ştatın Nümayəndələr Palatasının üzvləri Silvester Törner, Cessika Farrar, Alma Allen və Co Deşotel, Türkiyə, İtaliya, Yunanıstan və Xorvatiyanın Hyuston şəhərindəki Baş konsulluqlarının təmsilçiləri və ABŞ-dakı Azərbaycan və Türk diasporunun nümayəndələri olmuşdur.

Tədbiri giriş sözü ilə açan Hyuston-Bakı Qardaşlaşmış Şəhərlər Assosiasiyasının prezidenti İradə Axundova Hyuston-Bakı əlaqələrindən və bu şəhərdəki azərbaycanlı icmasının fəaliyyətindən danışmışdır.

Səfir E.Süleymanov Dövlət Bayrağı Gününün əhəmiyyətindən bəhs edərək, ilk dəfə 1918-ci ildə qaldırılan üçrəngli dövlət bayrağının bu gün qüdrətli Azərbaycan dövlətinin müstəqillik rəmzi kimi bütün soydaşlarımızın qürur mənbəyi olduğunu demişdir. E.Süleymanov Prezident İlham Əliyev tərəfindən Dövlət Bayrağı Gününün təsis olunduğunu və Dövlət Bayrağı Meydanının yaradıldığını xatırladaraq, dövlət başçısının ölkəmizin müstəqilliyinin möhkəmləndirilməsi istiqamətindəki xidmətlərini xüsusi vurğulamışdır. Səfir bir ay əvvəl - oktyabrın 9-da keçirilən seçkilərdə Azərbaycan xalqının mütləq çoxluqla İlham Əliyevi növbəti dəfə Prezident seçməsinin eyni zamanda Azərbaycanın dövlət müstəqilliyinin gücləndirilməsi siyasətinin hamılıqla dəstəkləndiyinin ifadəsi olduğunu bildirmişdir.

E.Süleymanov Azərbaycan və Texas arasındakı xüsusi dostluq münasibətlərini yüksək qiymətləndirmiş, tədbirdə iştirak edən ştat rəsmilərinə öz təşəkkürünü bildirmişdir. Diplomat Azərbaycanın Dövlət Bayrağı Günü münasibəti ilə ABŞ-da əsas ziyafətin məhz bu şəhərdə keçirilməsinin Bakı və Hyuston arasındakı münasibətlərin inkişaf səviyyəsinin bir göstəricisi olduğunu qeyd etmişdir.

Eyni zamanda, səfir Azərbaycanın Dövlət Bayrağı Gününə həsr olunmuş tədbirdə iştirak etmək üçün Nyu Meksiko ştatından gələn qonaqları, o cümlədən Nyu Meksiko Senatının prezidenti Meri Papeni salamlamış, ştatın Azərbaycanla bağlı təşəbbüslərinin, o cümlədən Xocalı faciəsinin soyqırımı kimi tanınmasının yüksək qiymətə layiq olduğunu demişdir.

Tədbirdə çıxış edən konqresmen Stiv Stokman Azərbaycanın ABŞ-ın ən əhəmiyyətli tərəfdaşlarından biri olduğunu bildirmişdir. O, bu ilin mayında Azərbaycana etdiyi səfəri xatırladaraq, ölkənin sürətli inkişafının şahidi olduğunu və bu inkişafın əldə olunmasında dövlətimizin başçısının xüsusi rolunu vurğulamışdır. Konqresmen Stokman Azərbaycanın yaxın dostu olduğunu və ikitərəfli münasibətlərin daha da gücləndirilməsi üçün əlindən gələni edəcəyini diqqətə çatdırmışdır.

Konqres üzvü Şeyla Cəkson Li Azərbaycan və ABŞ-ın terrorizmə qarşı mübarizə, regional və enerji təhlükəsizliyi kimi sahələrdə sıx əməkdaşlıq etdiyini vurğulayaraq demişdir ki, cənab İlham Əliyevin yenidən Prezident seçilməsi ikitərəfli münasibətlərin inkişafı baxımından mühüm əhəmiyyətə malikdir. O, yaranmış fürsətdən istifadə edərək Azərbaycan xalqını İlham Əliyevin yenidən Prezident seçilməsi münasibəti ilə təbrik etmişdir. Şeyla Cəkson Li Azərbaycanın tolerantlıq ənənələrini və ölkə rəhbərliyinin dini və etnik mənsubiyyətindən, cinsindən asılı olmayaraq bütün vətəndaşlara xüsusi diqqət ayırdığını yüksək qiymətləndirmişdir.

Konqresmen Al Qrin öz çıxışında Azərbaycanın dinamik inkişaf etdiyini və ölkəmiz ilə münasibətlərin ABŞ xarici siyasəti baxımından önəmini vurğulamış, konqresdəki Azərbaycan üzrə işçi qrupun üzvü olaraq, ikitərəfli əlaqələrin inkişafı üçün səylərini davam etdirəcəyini bildirmişdir.

Texas ştatının Senatının üzvü Rodni Ellis tədbir iştirakçılarını təbrik edərək Dövlət Bayrağı Gününün məhz Texas ştatında belə təntənəli şəkildə qeyd olunmasına görə Azərbaycan tərəfinə öz təşəkkürünü bildirmişdir. R.Ellis Azərbaycana səfərini xatırladaraq, ölkəmizin inkişafa heyran qaldığını, Azərbaycanın uğurlu neft strategiyasının formalaşmasında Prezident İlham Əliyevin xüsusi rolunu və onun Hyustona səfərlərini qeyd etmişdir. Senator İlham Əliyevin yenidən Prezident seçilməsinin ölkəmizin gələcək inkişafının təminatı olduğunu diqqətə çatdırmışdır.

İlham Əliyevin növbəti dəfə Azərbaycan Prezidenti seçilməsi münasibətilə konqres üzvləri Stiv Stokman və Şeyla Cəkson Linin, habelə Texas ştatının senatoru Rodni Ellis və Nyu Meksiko ştatının prezidenti Meri Papenin təbrik məktublarına dövlətimizin başçısının cavab məktubları səfir E.Süleymanov tərəfindən onlara təqdim edilmişdir.

Azərbaycanın Dövlət Bayrağı Gününə xüsusi hörmətin əlaməti olaraq, konqres üzvləri Şeyla Cəkson Li, Al Qrin və Stiv Stokman ABŞ Konqresinin əsas binası olan Kapitolidə dalğalanmış ABŞ bayraqlarını səfir E.Süleymanova təqdim etmişlər. Bundan əlavə, Nyu Meksika Ştatının prezidenti Meri Papen və Texas ştatının senatoru Rodni Ellis tərəfindən təmsil etdikləri ştatların yerli qanunverici orqanlarında dalğalanmış bayraqlar da səfirə təqdim olunmuşdur. Eyni zamanda R. Ellis Texas ştatının Senatının Azərbaycanın Dövlət Bayrağı Günü münasibəti ilə qəbul etdiyi bəyanatı, konqres üzvü Şeyla Cəkson Li Dövlət Bayrağı Günü münasibətilə konqresin sertifikatını, konqresmen Al Qrin isə ABŞ ilə Azərbaycan arasındakı diplomatik münasibətlərin inkişafındakı töhfəsinə görə xüsusi sertifikatı səfirə təqdim etmişlər.

Ziyafətdə Azərbaycanın Dövlət Bayrağı Günü münasibətilə hazırlanmış videofilm nümayiş olunmuşdur. Yüksək bayram əhval-ruhiyyəsində keçən tədbir həm yüksək səviyyəli qonaqların iştirakı, həm də proqramın zənginliyi ilə yadda qalmışdır.