AZƏRBAYCAN RESPUBLİKASININ NAZİRLƏR KABİNETİNDƏ
“Azərbaycan Respublikası vətəndaşlarının 2002-ci il aprel ayının 1-dən 20-dək həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” Azərbaycan Respublikası Prezidentinin 2002-ci il 18 mart tarixli Fərmanının icrasını təmin etmək məqsədi ilə Azərbaycan Respublikasının Nazirlər Kabineti qərara almışdır ki, 2002-ci il aprelin 1-dən 20-dək həqiqi hərbi xidmətə çağırış vaxtı rayon (şəhər) çağırış komissiyalarına rəhbərlik və onların fəaliyyətinə nəzarət üzrə Respublika Çağırış Komissiyasının tərkibi təsdiq edilsin.
Naxçıvan Muxtar Respublikasının Nazirlər Kabineti Naxçıvan Muxtar Respublikasının çağırış komissiyasını, respublikanın şəhər və rayonlarının icra hakimiyyəti orqanları isə müvafiq şəhər və rayon çağırış komissiyalarını yaratsınlar.
Azərbaycan Respublikası Çağırış Komissiyasının sədri:
1984- cü ildə doğulmuş və çağırış günü üçün 18 yaşı tamam olmuş, habelə 1967-1983-cü illərdə doğulmuş, yaşı 35-dək olan, həqiqi hərbi xidmətə çağırışdan möhlət hüququ olmayan Azərbaycan Respublikası vətəndaşlarının Respublikanın Silahlı Qüvvələrinə və qanunvericilikdə nəzərdə tutulmuş digər silahlı birləşmələrinə həqiqi hərbi xidmətə çağırışını “Azərbaycan Respublikasında hərbi xidmətə çağırışın əsasları haqqında” Azərbaycan Respublikası Qanununun tələblərinə uyğun olaraq təşkil etsin;
ilk növbədə həqiqi hərbi xidmətə çağırışdan möhlət hüququnu itirəcək yuxarı yaşlı çağırışçıların, eləcə də çağırışdan yayınanların hərbi xidmətə çağırılması üçün müvafiq tədbirlər görsün;
çağırışçıların hərbi komissarlıqlardan yola salınmasını yerli icra hakimiyyəti orqanlarını, Böyük Vətən Müharibəsi veteranlarını və Azərbaycan Respublikasının müharibə veteranlarını cəlb etməklə, təntənəli şəraitdə keçirilməsini təmin etsin;
vətəndaşların qəbuluna, ərizə və şikayətlərinə baxılmasına həssaslıqla yanaşsın;
həqiqi hərbi xidmətə çağırışdan yayınan çağırışçıların axtarılmasını və onların hərbi xidmətə yola salınmasını yerli icra hakimiyyəti, hüquq mühafizə orqanları ilə sıx əlaqədə keçirsin.
Şəhər və rayon icra hakimiyyəti orqanları vətəndaşların həqiqi hərbi xidmətə çağırışının hazırlanması və keçirilməsi işinin təşkili ilə bağlı məsələlərdə hərbi komissarlıqlara hərtərəfli kömək göstərsinlər.
Azərbaycan Respublikasının Səhiyyə Nazirliyi respublikanın şəhər və rayon çağırış komissiyalarına lazımi sayda ixtisaslı həkim-mütəxəssislərin və orta tibb işçilərinin ayrılmasını, onların müvafiq tibbi-texnika, alətlər və digər ləvazimatlarla təchiz edilməsini və çağırışçıların tibbi yoxlanışının keyfiyyəti üzərində nəzarəti təmin etsin.
Azərbaycan Respublikasının Daxili İşlər Nazirliyi;
vətəndaşların həqiqi hərbi xidmətə çağırışını həyata keçirməkdə hərbi komissarlıqlara hərtərəfli kömək göstərsin;
ümumi hərbi mükəlləfiyyətdən yayınan şəxslərin axtarışının həyata keçirilməsi üçün lazımi tədbirlər görsün;
hərbi komissarlıqların toplanış və çağırış məntəqələrində ictimai asayişin qorunması üçün lazımi sayda polis işçilərinin, habelə respublika ərazisində çağırışçıları daşıyan avtomobil dəstələrinin müşayiəti üçün Dövlət Yol Polisi tərəfindən patrul maşınlarının ayrılmasını təmin etsin.
Respublika Çağırış Komissiyası sədrinin təqdimatına əsasən “Azərbaycan Hava Yolları” Dövlət Konserni, Azərbaycan Dövlət Dəmir Yolu, şəhər və rayon icra hakmiyyəti orqanları respublika toplanış məntəqəsinin işini təmin etmək üçün 2002-ci il aprelin 1-dən 20-dək respublika ərazisində çağırışçıların daşınmasını təşkil etsinlər.
Azərbaycan Respublikasının Rabitə Nazirliyi respublika toplanış məntəqəsini, rayon və şəhər hərbi komissarlıqlarının çağırış məntəqələrini etibarlı və fasiləsiz telefon rabitəsi ilə təmin etsin.
Azərbaycan Respublikasının Mədəniyyət Nazirliyi çağırış dövründə respublika toplanış məntəqəsində, həmçinin rayon və şəhər hərbi komissarlıqlarının çağırış məntəqələrində mədəni hamilik işinin aparılmasını təşkil etsin.
Qərarın icrasına nəzarət Azərbaycan Respublikası Nazirlər Kabineti İşlər İdarəsinin hərbi və inzibati orqanlar şöbəsinə və müvafiq şöbələrinə həvalə edilsin.
Bu qərar imzalandığı gündən qüvvəyə minir.
Bu haqda AZƏRTAC-a Nazirlər Kabinetinin mətbuat mərkəzindən məlumat vermişlər.
Bölmənin digər xəbərləri
