AZƏRBAYCAN RESPUBLİKASININ PREZİDENTİ İLHAM ƏLİYEV ABŞ NÜMAYƏNDƏ HEYƏTİNİ QƏBUL ETMİŞDİR
Qonaqları səmimi salamlayan dövlətimizin başçısı İlham Əliyev son illər ölkələrimiz arasında əlaqələrin çox sürətlə inkişaf etdiyini vurğuladı. Hazırda Azərbaycanla ABŞ arasında müxtəlif sahələrdə uğurlu əməkdaşlığın həyata keçirildiyini deyən Azərbaycan Prezidenti bütün bu proseslərin başlanğıcının bu yaxınlarda on illiyini qeyd edəcəyimiz neft sahəsində imzalanmış müqavilə ilə qoyulduğunu bildirdi. O dedi ki, siyasi, iqtisadi, təhlükəsizlik və digər sahələrdə sürətlə inkişaf edən əlaqələrimiz qarşılıqlı anlaşma və dəstəyə əsaslanır. Prezident İlham Əliyev Azərbaycanda iri enerji layihələrinin həyata keçirilməsində Amerika hökumətinin xüsusi rolunu yüksək qiymətləndirərək, buna görə ABŞ rəhbərliyinə minnətdarlığını ifadə etdi. Dövlətimizin başçısı gələcəkdə də ölkələrimiz arasında əlaqələrin bütün sahələrdə inkişaf edəcəyinə əminliyini vurğuladı.
Səmimi qəbula görə Azərbaycan Prezidentinə minnətdarlığını bildirən qonaq dövlətimizin başçısına ABŞ Prezidenti Corc Buşun səmimi salamlarını, həmçinin ABŞ dövlət katibi Kolin Pauellin və dövlət katibinin birinci müavini Riçard Armitacın ehtiramlarını çatdırdı. O qeyd etdi ki, Prezident Corc Buş Prezident İlham Əliyevlə İstanbulda keçirdiyi görüşü məmnunluqla xatırlayaraq, Azərbaycanın dövlət başçısı ilə orada apardığı danışıqları yüksək qiymətləndirmişdir.
Xanım Elizabet Cons daha sonra müxtəlif məsələlər ətrafında Azərbaycan Prezidenti İlham Əliyevlə apardığı çox səmərəli siyasi məsləhətləşmələrə görə minnətdarlığını bildirdi. Ölkəsinin Azərbaycanla əlaqələrinin sürətlə inkişaf etdiyini vurğulayan qonaq Azərbaycanın İraqda və Əfqanıstanda antiterror koalisiyasında fəal iştirakının ABŞ rəhbərliyi tərəfindən yüksək qiymətləndirildiyini bildirdi və bunu Azərbaycanın dost bir ölkə kimi fəaliyyətinin təzahürü adlandırdı.
Azərbaycan Prezidenti İlham Əliyev İstanbulda Prezident Corc Buşla keçirdiyi görüşü məmnunluqla xatırlayaraq, ABŞ Prezidentinə, habelə Kolin Pauellə və Riçard Armitaca səmimi salamlarını çatdırmağı xahiş etdi.
Görüşdə ölkələrimizi maraqlandıran məsələlər ətrafında müzakirələr aparıldı.
Xarici işlər naziri Elmar Məmmədyarov, Prezident Administrasiyasının xarici əlaqələr şöbəsinin müdiri Novruz Məmmədov, Azərbaycanın ABŞ-dakı səfiri Hafiz Paşayev və ABŞ-ın Azərbaycandakı səfiri Rino Harniş görüşdə iştirak edirdilər.
Bölmənin digər xəbərləri
