AZƏRBAYCAN RESPUBLİKASININ VƏKİLLƏR KOLLEGİYASI BU QURUMDA İŞLƏMƏK ARZUSUNDA OLANLARIN SƏNƏDLƏRİNİN QƏBULUNA BAŞLAYIR
AZƏRTAC xəbər verir ki, Azərbaycan Respublikası Vəkillər Kollegiyasının Rəyasət Heyəti “Vəkillər və vəkillik fəaliyyəti haqqında” Qanunun tələbinə uyğun olaraq, Vəkillər Kollegiyasında işləmək arzusunda olan şəxslərin sənədlərinin qəbuluna başlayır.
Vəkillər Kollegiyasının Rəyasət Heyətindən bildirmişlər ki, qanunvericiliklə müəyyən olunmuş tələblərə cavab verən şəxslər aşağıdakı sənədlərini Rəyasət Heyətinə təqdim etməlidirlər:
Rəyasət Heyəti tərəfindən müəyyən olunmuş formada ərizə; şəxsiyyət vəsiqəsinin notariat tərəfindən təsdiq edilmiş surəti; ali təhsil barədə diplom və onun notariatda təsdiq edilmiş surəti; əmək kitabçasının notariat tərəfindən və ya iş yerində təsdiq edilmiş surəti; kadrların şəxsi məlumat vərəqəsi; tərcümeyi-hal; əqli cəhətdən sağlamlıq barədə tibbi arayış; 3x4 sm ölçüdə 4 ədəd rəngli fotoşəkil.
Sənədlər Vəkillər Kollegiyası Rəyasət Heyətinin binasında (Bakı, S.Vurğun küçəsi, 32) 2008-ci il iyulun 15-dən noyabrın 15-dək şənbə və bazar günlərindən başqa hər gün saat 14-dən 17-dək qəbul olunur.
İxtisas imtahanlarının keçirilmə tarixi barədə əlavə məlumat veriləcəkdir.
Vəkillər Kollegiyasının Rəyasət Heyəti ilə 494-14-95 və 494-08-70 nömrəli telefonlarla əlaqə saxlamaq olar.
