AZƏRBAYCAN ŞAHMATÇILARI AVROPA CEMPİONATINDA 2-Cİ YERƏ YÜKSƏLMİŞLƏR
Bakı, 26 oktyabr (AZƏRTAC). Serbiyanın Novi-Sad şəhərində keçirilən şahmat üzrə Avropa çempionatının 4-cü turunda Azərbaycanın kişilərdən ibarət komandası İsrail təmsilçilərinə 2,5:1,5 hesabı ilə qalib gəlmişdir.
Görüşdə aşağıdakı nəticələr qeydə alınmışdır: Emil Sutovski-Teymur Rəcəbov 0,5:0,5, Mixail Rois-Vüqar Həşimov 0:1, Viktor Mixaylevski-Qadir Hüseynov 1:0, Evgeniy Postnıy-Şəhriyar Məmmədyarov 0:1
Bu görüşdən sonra şahmatçılarımız 10,5 xalla turnir cədvəlində 2-ci pilləyə yüksəlmişlər. Turnirdə əlavə göstəricilərə görə milli komandamızı qabaqlayan Gürcüstan yığması (10,5xal) liderlik edir.
Qadın şahmatçılarımız isə Rumıniya idmançılarını böyük hesabla (3,5:0,5) məğlubiyyətə uğradaraq 2-ci yerdə qərarlaşmışlar. Zeynəb və Türkan Məmmədyarova bacıları və Xəyalə İsgəndərova rumıniyalı rəqiblərini məğlub etmiş, Gülnar Məmmədova isə “sülh”ə imza atmışdır. Bu qələbədən sonra Azərbaycanın qadınlardan ibarət yığması 11,5 xalla Gürcüstan kollektivi ilə 1-2-ci yerləri bölüşür.
Avropa çempionluğu uğrunda 38 kişi və 28 qadın komandası mübarizə aparır.
Bölmənin digər xəbərləri
