Azərbaycan şahmatçıları qitə çempionatının gümüş medallarına sahib olublar
Bakı, 1 oktyabr, AZƏRTAC
Xorvatiyanın Poreç şəhərində keçirilən yeniyetmələrin Avropa çempionatı başa çatıb.
AZƏRTAC xəbər verir ki, 8-18 yaşadək şahmatçıların ayrı-ayrı yaş qrupları üzrə mübarizə apardığı çempionat 9 turdan ibarət olmaqla İsveçrə sistemi üzrə keçirilib.
Ümumilikdə 25 Azərbaycan şahmatçısının mübarizə apardığı çempionatın finişində təmsilçilərimizdən 3-ü fəxri kürsüyə yüksələ bilib. On yaşadək qızlar arasında mübarizə aparan Ayan Allahverdiyeva aktivinə 7 xal yazaraq gümüş medala sahib olub. Gövhər Beydullayeva isə 12 yaşadək qızların yarışında ikinci yeri tutub. Ölkəmizə 3-cü gümüş medalı isə 8 yaşadək oğlanların çempionatında mübarizə aparan Riad Səmədov qazandırıb. Eyni yaşlı qızların mübarizəsində Nurtac Heydərli 4-10-cu yerləri bölüşdürərək yarışı 6-cı pillədə tamamlayıb. Nərmin Məmmədova 5,5 xalla 18 yaşadək qızlar arasında 8-12-ci yerləri bölüşdürüb. Aydın Süleymanlı isə 6,5 xalla 10 yaşlı oğlanların yarışında 6-cı olub.
Digər şahmatçılarımız isə müxtəlif yerlərdə qərarlaşsalar da mükafatçılar sırasına düşə bilməyiblər.
Bölmənin digər xəbərləri
