AZƏRBAYCAN SƏFİRİ FRANSANIN YÜKSƏK ORDENİ İLƏ TƏLTİF OLUNMUŞDUR
Fransa hökumətinin 2002-ci il 19 aprel tarixli sərəncamı ilə Azərbaycan Respublikasının Fransadakı fövqəladə və səlahiyyətli səfiri Eleonora Hüseynova ölkənin ən yüksək mükafatlarından biri olan “Palm akademik” ordeninin komandor dərəcəsi ilə təltif edilmişdir.
Bu fəxri mükafat Fransa mədəniyyətinin inkişaf etdirilməsində, onun intellektual və tarixi - mədəni nüfuzunun dünyada tanıdılmasında xüsusi xidmətləri olan fransızlara və müstəsna hallarda, xarici vətəndaşlara verilir.
Eleonora xanım respublikamızın xarici ölkələrdəki diplomatik missiyaların rəhbərləri arasında Fransanın bu yüksək mükafatına layiq görülmüş ilk səfir və Azərbaycanın yeganə vətəndaşıdır.
Fransa hökuməti E.Hüseynovanın ölkələrimiz arasında hərtərəfli əlaqələrin inkişafı sahəsindəki xidmətlərini nəzərə alaraq, onu bu ordenə təqdim etmişdir.
Azərbaycan diplomatiyası tarixindəki bu əlamətdar hadisə dövlətlərimiz arasında daim inkişaf edən sıx və səmimi əlaqələrin daha bir təzahürüdür.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
