REGİONLAR
Azərbaycan Texnologiya Universitetində respublika elmi konfransı keçirilib
Gəncə, 11 mart, Elcan Məmmədov, AZƏRTAC
Azərbaycan Texnologiya Universitetinin (UTECA) təşkilatçılığı ilə “Texnoloji inkişaf iqtisadi inkişafın əsasıdır” adlı müəllim və gənc tədqiqatçıların respublika elmi konfransı keçirilib.
Universitetdən AZƏRTAC-ın bölgə müxbirinə verilən məlumata görə, konfransın onlayn keçirilən plenar iclasını Azərbaycan Texnologiya Universitetinin rektoru, professor Akif Süleymanov açaraq bildirib ki, müasir iqtisadiyyat texnologiyanın inkişafından asılıdır. “Texnologiyanın inkişafı, texnoloji ideyalar yenilikləri sevir və bu istiqamətdə Azərbaycan Texnologiya Universiteti də yüksəkixtisaslı kadrların yetişdirilməsində və tələbələrin tədqiqata cəlb edilməsində mühüm addımlar atmaqdadır,” - deyən rektor Azərbaycan Texnologiya Universitetinin TEKNOFEST Azərbaycan festivalına hazırlığı barədə məlumatlar verib. O, UTECA-nın 5 komandasının dörd müsabiqə üzrə qeydiyyatdan keçdiyini və komandaların layihələr üzərində ciddi çalışdıqlarını söyləyib.
Sonra Gəncə Şəhər İcra Hakimiyyəti başçısının müavini Adil Tağıyev, Türkiyə və Azərbaycan İş Adamları və Sənayeçilər Birliyinin sədri Hüseyn Böyükfırat, Dördüncü Sənaye İnqilabının Təhlili və Koordinasiya Mərkəzinin Təhlil və Monitorinq şöbəsinin mütəxəssisi Aygün Əhmədova, KOBİA katibliyinin rəhbəri Elmar İsayev, AMEA İqtisadiyyat İnstitutunun şöbə müdiri, professor Fuad Qənbərov, Bakı Mühəndislik Universitetinin elmi işlər üzrə prorektoru Elçin Süleymanov, Bakı Avrasiya Universitetinin elmi işlər üzrə prorektoru, professor Gülzar İbrahimova, Mingəçevir Dövlət Universitetinin elmi işlər üzrə prorektoru, professor Veysəl Eyyubov və digər elm adamları çıxış ediblər. Çıxışlarda konfransın mövzusunun müasir tələblərlə uzlaşdığı xüsusilə vurğulanaraq tədbirin məhsuldar olacağına əminlik ifadə edilib.
Konfransın plenar iclasında UTECA-nın Marketinq kafedrasının baş müəllimi, 2021-ci ildə UTECA-da “İlin gənc alimi” adına layiq görülən Sevinc Babakişiyeva “Müasir texnologiyaların müasir iqtisadiyyatda rolu”, Tələbə Elmi Cəmiyyətinin sərdi Aysel Məmmədli “Startapların yaradılmasında universitetlərin rolu”, Yüngül sənaye mühəndisliyi və logistika fakültəsinin I kurs tələbəsi Elmir Mollayev isə “PUA-ların həndəsi parametrlərini dəyişməklə aerodinamik keyfiyyətinin yaxşılaşdırılması” adlı məruzələrlə çıxış ediblər.
Plenar iclasın yekunundan sonra respublika konfransı panellərdə davam edib. Qida mühəndisliyi, Logistika mühəndisliyi, Yüngül sənaye mühəndisliyi, Metal və materiallar mühəndisliyi, İnformasiya texnologiyaları və kompüter mühəndisliyi, İqtisadiyyat və menecment, Davamlı inkişaf və təhsil texnologiyaları istiqamətləri üzrə həyata keçirilən panel iclaslarında müəllim və gənc tədqiqatçıların aktual məruzələri dinlənilib.
Konfransın məcmuələr toplusuna 200-dən çox tezis daxil edilib.