AZƏRBAYCAN UŞAQ FONDU ULU ÖNDƏR HEYDƏR ƏLİYEVİN 85 İLLİK YUBİLEYİ MÜNASİBƏTİLƏ TƏDBİR KEÇİRMİŞDİR
AZƏRTAC xəbər verir ki, aprelin 14-də Beynəlxalq Mətbuat Mərkəzində Azərbaycan Uşaq Fondu (AUF) ulu öndər Heydər Əliyevin 85 illik yubileyi və fondun 20 illik fəaliyyəti ilə bağlı mətbuat konfransı keçirmişdir. Tədbirdə çıxış edən AUF-un sədri, Sosialist Əməyi Qəhrəmanı, akademik İsmayıl İbrahimov ümummilli lider Heydər Əliyevin şərəfli ömür yolundan, Azərbaycan xalqı qarşısında göstərdiyi əvəzsiz xidmətlərindən söz açmışdır.
Prezident İlham Əliyevin müvafiq Sərəncamı ilə yubileyin dövlət səviyyəsində qeyd olunacağını vurğulayan natiq bildirmişdir ki, Azərbaycan tarixinin taleyüklü hadisələrlə dolu 30 ildən artıq bir dövrü bu böyük şəxsiyyətin adı ilə bağlıdır. Həmin dövr ərzində Heydər Əliyev Azərbaycan dövlətini və millətini zamanın ən çətin sınaqlarından çıxararaq, ölkəmizin ictimai-siyasi, iqtisadi, mədəni və mənəvi tərəqqisinə nail olmuşdur. Heydər Əliyev özünün dövlət idarəçiliyi ilə bağlı strateji proqramında mədəni və mənəvi intibahı həmişə sənayedə və iqtisadiyyatdakı uğurlarla əlaqələndirərək vahid məcraya yönəldirdi. 1969-1982-ci illər Azərbaycan salnaməsinin həyatımızın bütün sahələrində baş verən köklü dəyişikliklərlə zəngin səhifələrini təşkil edir.
İsmayıl İbrahimov xüsusi olaraq vurğulamışdır ki, ölkəmizin müstəqilliyinin və dünya iqtisadiyyatına inteqrasiyası proseslərinin möhkəm təməli Heydər Əliyev tərəfindən qoyulmuşdur. Xalqın təkidli istəyi ilə hakimiyyətə qayıdan ulu öndər siyasi təcrübəsi, uzaqgörənliyi və sarsılmaz iradəsi sayəsində ölkəni vətəndaş müharibəsi təhlükəsindən və ictimai-siyasi pərakəndəlikdən qurtardı, qanunçuluğu bərpa etdi və cəmiyyəti vahid məfkurə ətrafında birləşdirdi.
Bildirilmişdir ki, 1994-cü ildə Heydər Əliyev neft strategiyasının reallaşdırılmasını təmin edən “əsrin müqaviləsinin” imzalanması Azərbaycan xalqının öz maddi sərvətlərinin, o cümlədən neftinin həqiqi sahibi kimi çıxış etməsinin təntənəsinə çevrildi. Bu müqavilə ölkəmizin tarixində yeni dövr açdı. Dinamik inkişafa təkan verərək müstəqilliyimizin iqtisadi bünövrəsinin möhkəmlənməsi və Azərbaycanın dünyada analoqu olmayan sürətlə inkişaf etməsi üçün zəmin yaratdı. Hazırda Heydər Əliyevin adını daşıyan Bakı-Tbilisi-Ceyhan neft kəməri xalqımızın ümummilli liderinin ideyalarının gerçəkləşməsinin parlaq təcəssümüdür.
İ.İbrahimov məlumat vermişdir ki, UAF 1988-ci il aprelin 14-də Heydər Əliyevin rəhbərliyi altında yaradılmış Sovet Uşaq Fondunun Azərbaycan şöbəsinin varisidir. Bu gün Prezident İlham Əliyevin diqqət və qayğısı sayəsində uşaqların tərəqqisi, inkişafı naminə yorulmadan fəaliyyət göstərir. Ötən dövr ərzində AUF-da 500-dən çox iclas keçirilmiş və 3000-ə yaxın məsələyə baxılmışdır. Fond tərəfindən uşaqlara yardımlar edilmiş, valideyn himayəsindən məhrum uşaqlara, aztəminatlı ailələrdə yaşayan körpələrə tez-tez yardımlar göstərilmiş, xəstə uşaqların ev və ya xəstəxana şəraitində müalicəsi, onların tədris vəsaiti ilə təminatı və başqa sosial-müdafiə səciyyəli tədbirlər həyata keçirmişdir.
Vurğulanmışdır ki, respublikamız müstəqillik qazandıqdan sonra fond BMT-nin “Uşaq hüquqları haqqında konvensiya”sına qoşulmuş və bununla əlaqədar üzərinə məsuliyyətli vəzifələr götürmüşdür.
Tədbirdə çıxış edən digər natiqlər AUF-un son illər ərzində gördüyü işləri yüksək qiymətləndirmiş, qurumun fəaliyyətində uşaqların ümumi və estetik tərbiyəsinin mühüm yer tutduğunu söyləmişlər.
Bölmənin digər xəbərləri
