AZƏRBAYCAN VƏ PAKİSTAN ORTAQ MARAQLARA MALİKDİRLƏR
AZƏRTAC xəbər verir ki, xarici işlər naziri Elmar Məmmədyarov ölkəmizdə səfərdə olan Pakistan Senatının xarici əlaqələr daimi komitəsinin sədri Müşahid Hüseyn Səidin başçılıq etdiyi nümayəndə heyəti ilə görüşmüşdür.
Nazirliyin mətbuat xidmətindən bildirmişlər ki, Azərbaycan və Pakistanın ortaq maraqlara malik olduğunu bildirən nazir E.Məmmədyarov ölkələrimiz arasında müxtəlif sahələrdə əməkdaşlığın genişləndiyini, həmçinin iqtisadi və siyasi əlaqələrin inkişaf etdirilməsinin əhəmiyyətini vurğulamışdır.
BMT Baş Məclisində Azərbaycanın işğal olunmuş ərazilərindəki vəziyyətlə bağlı qətnamənin qəbul olunmasında Pakistanın dəstəyindən danışan qonaqlar, bunu Pakistan tərəfinin Azərbaycanla əməkdaşlığa verdiyi yüksək önəmin bariz nümunəsi kimi dəyərləndirmişlər. Ölkələrimiz arasında bütün sahələrdə, xüsusilə iqtisadi sahədə əlaqələrin inkişaf etdirilməsi üçün geniş imkanlar olduğu qeyd edilmişdir.
Müxtəlif regional və qlobal məsələlərə toxunan tərəflər, ölkələrimizin üzləşdiyi problemlərin həllində qarşılıqlı dəstəyin vacibliyini vurğulamışlar.
Görüşdə enerji sektoru, insan resurslarının mübadiləsi, habelə qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
