Azərbaycan xalçalarının əsrarəngiz motivləri, əlvan rəngləri göz oxşayır
Paris, 3 fevral, AZƏRTAC
Azərbaycanın xalçaçılıq sənəti ilə tanışam. UNESKO-nun Ümumdünya İrs Komitəsinin Bakıda keçirilən 43-cü sessiyası çərçivəsində Milli Xalça Muzeyini ziyarət etdim. Azərbaycan xalçalarının əsrarəngiz motivləri, əlvan rəngləri göz oxşayır. Belə bir sərginin UNESKO-nun baş qərargahında təşkil edilməsi vacibdir və bu bizi çox sevindirdi.
Bu sözləri AZƏRTAC-a müsahibəsində Heydər Əliyev Fondu tərəfindən UNESKO-nun baş qərargahında təşkil edilmiş “Yeni kəşflər: Azərbaycan xalçaçılığında yeni motivlər” adlı sərginin ziyarətçisi, Venesuelanın UNESKO yanında Daimi Nümayəndəliyinin rəhbəri, səfir Hektor Alexandro Konstant Rosales deyib.
Bildirib ki, Azərbaycanın zəngin mədəniyyətini, tarixi keçmişini daha yaxından tanımaq üçün bu sərginin əhəmiyyəti böyükdür: “UNESKO yanında Azərbaycan Daimi Nümayəndəliyi çox fəaldır. Azərbaycan bütün dünya ölkələri ilə, o cümlədən Venesuela ilə əlaqələrini inkişaf etdirir. Ötən il Qoşulmama Hərəkatına sədrlik Venesueladan Azərbaycana keçib. Bu keçid, iki dost dövləti bir-birinə daha da yaxınlaşdırdı”.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
