AZƏRBAYCAN YIĞMASI AVROPA ÇEMPİONATININ FİNAL MƏRHƏLƏSİNƏ YÜKSƏLMİŞDİR
AZƏRTAC xəbər verir ki, qadınlardan ibarət Azərbaycan yığma voleybol komandası Avropa çempionatının final mərhələsinə yüksəlmişdir.
Voleybolçularımız bu uğuru Yunanıstanda reallaşdırmışlar. Turnirin pley-off mərhələsində yerli komandanı sınağa çəkən qızlarımız rəqib komandanı 3:1 hesabı ilə məğlub etmişlər. Bununla da komandamız 2009-cu ilin sentyabrında Polşada keçiriləcək qitə birinciliyinin final mərhələsində mübarizə aparmaq hüququ əldə etmişdir.
Komandalar arasında ilk görüş Quba Olimpiya-İdman Kompleksində keçirilmişdir. Voleybolçularımız bu görüşdə Yunanıstan təmsilçiləri üzərində 3:0 hesablı qələbə qazanmışlar.
Xatırladaq ki, qadın yığmamız indiyədək iki dəfə bu cür yarışın final mərhələsinə qatılmışdı. Voleybol yığmamız 2005-ci ildə Xorvatiyada 4-cü, ötən il isə Belçika və Lüksemburqda təşkil olunan birincilikdə 12-ci yeri tutmuşdur.
Bölmənin digər xəbərləri
