AZƏRBAYCANDA AVARÇƏKMƏNİN 50 İLLİK YUBİLEYİ QEYD OLUNACAQDIR
Bakı, 10 noyabr (AZƏRTAC). Noyabrın 14-də Mingəçevir şəhərindəki “Kür” Təlim-Tədris İdman Mərkəzində akademik, kayak və kanoe qayıqlarında avarçəkmə üzrə ənənəvi “Mingəçevir reqatası” start götürəcəkdir. İki gün davam edəcək yarış Azərbaycanda avarçəkmənin inkişaf dövrünə başlamasının 50 illik yubileyinə təsadüf edəcəkdir.
İlk dəfə 1959-cu ilin iyul-avqust aylarında Bakıdakı Dənizkənarı Parkın ərazisində yerləşən “Neftçi” yaxt-klubunda gənclər avarçəkmə ilə məşğul olmağa başlamışlar. Həmin il respublikamızın akademik avarçəkənləri SSRİ xalqlarının II spartakiadasında çıxış etmişlər. Yarışda Azərbaycanı avarçəkmənin 13 növündən 5-də 12 idmançı təmsil etmişdir. Onların arasında Yevgeni Əmir-Şah, Tamerlan Kusov, Gedalio Sadıxoğlu, Vladislav Şvetsov kimi tanınmış avarçəkənlər vardı.
1964-cü ildə Mingəçevir şəhərində “Kür” avarçəkmə hazırlığı üzrə Olimpiya mərkəzinin istifadəyə verilməsi Azərbaycanda avarçəkmənin inkişafına böyük təkan vermişdir. Bu bazanın tikintisində Mingəçevir şəhər idman komitəsinin sabiq sədri, mərhum Pərviz Həsənovun xüsusi xidmətləri olmuşdur. Məhz onun təşəbbüsü ilə Mingəçevirdə Kür çayı sahilində ümumittifaq əhəmiyyətli idman qurğusu inşa olunmuşdur. Keçmiş SSRİ-nin akademik avarçəkmə üzrə yığma komandası məhz bu bazada hazırlıq keçmişdir. Avarçəkənlərin yüksək hazırlıq səviyyəsinin nəticəsidir ki, Avropa, dünya çempionatları və Yay Olimpiya Oyunlarında SSRİ yığması uğurlu nailiyyətlər qazanmışdır. Bu komandanın tərkibində Azərbaycan avarçəkənləri də yer almışlar.
1970-ci ildən etibarən “Mingəçevir reqatası” ümumittifaq statusu almışdır. Amma bu turnirə təkcə keçmiş SSRİ-nin avarçəkənləri qatılmamışdılar. Müxtəlif illərdə Bolqarıstan, Çexoslovakiya, hətta Kuba təmsilçiləri də “Mingəçevir reqatası”nda qüvvələrini sınamışlar. Müxtəlif respublikaların avarçəkənlərinin iştirak etdiyi yarışlar idmançılarımızın hazırlıq səviyyələrinə də müsbət təsir göstərmişdir. Avarçəkənlərimiz sonrakı 20 il ərzində də yüksək nailiyyətlər göstərmişlər. Lakin Ermənistanın Azərbaycana təcavüzü ilə əlaqədar doğma yurd-yuvalarından didərgin düşən insanların avarçəkmə bazasında məskunlaşmasından sonra bu idman növündə xeyli geriləmə olmuşdu. Azərbaycan Prezidenti İlham Əliyev Mingəçevirə səfəri zamanı bazaya baş çəkərək, onun müasir tələblərə uyğun yenidən qurulması barədə göstəriş verdikdən sonra Azərbaycan Milli Avarçəkmə Federasiyası təsis olunmuş və Azərbaycanda avarçəkmə növləri dirçəliş dövrünə qədəm qoymuşdur.
Bu gün Cavid Əfəndiyev, Aleksandr Jdanov, Toğrul Qurbanzadə, Teymur Kutseba, Aleksandr Qlotov, Kamal Məmmədov kimi gənc və perspektivli akademik avarçəkənlərimiz, dünya və Avropa çempionatlarında medallar qazanan Valentin Demyanenko, Sergey Bezuqlıy, Maksim Prokopenko kimi kanoeçilərimiz vardır.
Federasiya rəhbərliyi veteran avarçəkənlərimizi də diqqətdən kənarda qoymur. Məhz buna görə qarşıdakı “Mingəçevir reqatası”na veteran avarçəkənlərimiz də dəvət olunmuşlar. Artıq 11 qat Azərbaycan çempionu, 1959-cu, 1963-cü və 1967-ci ildə keçirilmiş SSRİ xalqları spartakiadalarının iştirakçısı Vladislav Şvetsovun ölkəmizə gələcəyi dəqiqləşmişdir. Eyni zamanda, 1952-ci il Helsinki Yay Olimpiya Oyunlarının gümüş mükafatçısı, əməkdar idman ustası, SSRİ-nin əməkdar məçqçisi Yevgeni Samsonov, Rusiya Federasiyasının Dövlət İdman Komitəsinin sabiq sədri, avarçəkmə üzrə dövlət məşqçisi Nikolay Rusak da yarışı izləyənlər arasında olacaqdır. “Mingəçevir reqatası”nın baş hakimi isə ukraynalı mütəxəssis Mixail Syabrodur.
Turnirin təntənəli açılış mərasimi noyabrın 13-də keçiriləcəkdir.
Bölmənin digər xəbərləri
