CƏMİYYƏT
Azərbaycanda peyvəndlərin aparılması nəticəsində bir sıra xəstəliklərin qarşısı alınmışdır
Bakı, 2 iyul (AZƏRTAC). Azərbaycanda peyvəndlərin aparılması nəticəsində bir sıra xəstəliklər qlobal səviyyədə aradan qaldırılmışdır. Ağır yoluxucu xəstəlik olan poliomielitə yoluxanların sayı Səhiyyə Nazirliyi tərəfindən görülən tədbirlər nəticəsində sıfıra endirilmişdir.
Bu barədə AZƏRTAC-a Səhiyyə Nazirliyinin İctimai Səhiyyə və İslahatlar Mərkəzindən (İSİM) məlumat verilmişdir.
Məlumatda bildirilir ki, 2002-ci ildə Dünya Səhiyyə Təşkilatı Azərbaycana “poliomielitdən azad ölkə” statusunu vermişdir.
Yoluxucu xəstəliklər əleyhinə peyvənd olunmaq çox vacibdir. Yalnız sağlam uşaqlar peyvənd oluna bilərlər. Bundan əvvəl isə həkim mütləq uşağı müayinə etməlidir.
Azərbaycanda milli immunlaşdırma proqramı dövlət tərəfindən dəstəklənir. Hazırda profilaktik peyvəndlər Səhiyyə Nazirliyi tərəfindən 1994-cü ildə təsdiq olunmuş peyvənd təqviminə əsasən həyata keçirilir. Bir sıra xəstəliklərin törədicisi olan pnevmokokk infeksiyası hava-damcı yolu ilə yayılır. Ölkəmizdə pnevmokokk infeksiyasının profilaktikası üçün istifadə olunan vaksin tam təhlükəsizdir. Valideynlər uşaqlarına pnevmokokk əleyhinə peyvəndi 2, 4 və 6 aylığında vurdurmalıdır.