Azərbaycanı bütün dünyada tanınması ulu öndər Heydər Əliyevin xidmətidir
Sumqayıt, 15 iyul (AZƏRTAC). Sumqayıtdakı Heydər Əliyev Mərkəzində “1969-cu ilin 14 iyul tarixi - Azərbaycanda milli intibahın başlanğıcı” mövzusunda konfrans keçirilib.
AZƏRTAC xəbər verir ki, əvvəlcə ümummilli lider Heydər Əliyevin zəngin həyatını əks etdirən qısametrajlı film nümayiş olundu. Konfransı giriş nitqi ilə açan Sumqayıt şəhər icra hakimiyyətinin başçısının müavini Elgin Həbubullayev müasir, müstəqil Azərbaycan dövlətinin əsas təməl prinsiplərinin ulu öndər Heydər Əliyev tərəfindən yaradıldığını qeyd etdi. Bildirildi ki, məhz Heydər Əliyevin hakimiyyətə gəlişi ilə Azərbaycan qısa zamanda ittifaq miqyasında iqtisadi baxımdan özünü təmin edən respublikalar sırasına daxil olmuşdu. Ümummilli Liderin hakimiyyəti dövründə Azərbaycanda milli özünüdərk, milli özünəqayıdış, vətənpərvərliyin gücləndirilməsi baxımından əhəmiyyətli addımlar atılmışdı.
Sumqayıt Şəhər Gənclər və İdman Baş İdarəsinin rəisi Musa Həsənov Ümummilli Liderin hakimiyyətə gəlişini Azərbaycanın yenidən yaranışı kimi səciyyələndirərək bildirdi ki, ölkəmizin bütün dünyada tanıdılması dahi siyasətçi Heydər Əliyevin misilsiz xidmətlərindən biridir. Bu siyasətin nəticəsi olaraq dünya dövlətləri Azərbaycanla bir çox sahələrdə bərabər hüquqlu əlaqələr qurublar.
Digər çıxış edənlər Azərbaycanı müstəqil dövlət quruculuğuna aparan yolun öz başlanğıcını əslində Heydər Əliyevin hakimiyyətə gəlməsi ilə götürdüyü fikrini səsləndirdilər. Belə ki, məhz Ulu Öndərin hakimiyyətə gəlişindən sonra sənayedə, kənd təsərrüfatında, mədəniyyət, incəsənət, kino, teatr, rəssamlıq və digər sahələrdə intibah dövrü başlandı.
Konfransda daha bir fikir xüsusi vurğulandı ki, Ulu Öndərin hakimiyyəti illərində Azərbaycanda müşahidə olunan inkişaf, yüksəliş, tərəqqi bu gün də dövlətimizin başçısı İlham Əliyevin rəhbərliyi ilə uğurla davam etdirilir.
Bölmənin digər xəbərləri
