“AZƏRBAYCANI İNFORMASİYALI CƏMİYYƏTƏ ÇEVİRƏK” MÖVZUSUNDA KONFRANS KEÇİRİLMİŞDİR

21.04.2006 [14:29]
Çap et
A⁺ A^-

AZƏRTAC xəbər verir ki, Azərbaycan Dövlət Mədəniyyət və İncəsənət Universitetində (ADMİU) “Azərbaycanı informasiyalı cəmiyyətə çevirək” mövzusunda elmi-nəzəri konfrans keçirilmişdir.

Universitetin kulturologiya fakültəsinin dekanı, fəlsəfə elmləri namizədi, dosent Abdin Əlizadə ölkəmizdə informasiya texnologiyalarının inkişafına böyük önəm verildiyini bildirmişdir.

Sonra “Azərbaycan informasiya cəmiyyətinə doğru irəliləyir”, “Elektron ticarət müasir ticarət vasitəsi kimi”, “Kino çəkilişlərində rəqəmli texnologiyaların tətbiqi problemləri”, “Mədəniyyət sahələrində kompyuter texnologiyaları” və s. mövzularda çıxışlar olmuşdur.

Qeyd edilmişdir ki, Azərbaycanda informasiya cəmiyyətinin formalaşması istiqamətində həyata keçirilən tədbirlər beynəlxalq aləmdə yüksək qiymətləndirilir.

Natiqlər informasiya texnologiyalarının iqtisadiyyat, elm, idarəçilik və digər sahələrdə tətbiqinin vacibliyindən və əhəmiyyətindən də danışmışlar.