Əvvəlki illərdə olduğu kimi, cari ilin ötən dövrü ərzində də cinayətlərin açılma göstəriciləri yüksək olmuş, qanunçuluğun və hüquq qaydalarının qorunması üzrə görülən işlər daha intensiv xarakter daşımışdır.

Son vaxtlar həyata keçirilmiş birgə əməliyyat–axtarış və istintaq tədbirləri nəticəsində bağlı qalmış bir sıra cinayətlərin açılması təmin edilmişdir.

Məsələn, 2004-cü il aprelin 20-də, Siyəzən rayonu ərazisində üzərində zorakılıq əlamətləri olan 20-25 yaşlarında qadın meyiti aşkar edilmişdir. Daxili İşlər Nazirliyi Baş Cinayət Axtarışı İdarəsinin və ərazi polis şöbəsinin rayon prokurorluğu ilə birgə həyata keçirdikləri tədbirlər nəticəsində müəyyən edilmişdir ki, qətlə yetirilmiş şəxs Quba rayon sakini, 19 yaşlı İlhamə Məlikovadır. Onun qısqanclıq zəminində, atası İlqar Məlikov tərəfindən öldürüldüyü aparılan əməliyyat istintaq tədbirləri nəticəsində sübuta yetirilmişdir.

Bundan başqa, mayın 3-də, Mingəçevir şəhər sakini Şərifə Rüstəmovanın və azyaşlı qızı Sədaqətin xüsusi amansızlıqla öldürülməsi hadisəsinin üstü də qısa müddətdə açılmışdır.

Cinayət törətmiş Nəriman Ağalarov respublika Baş Prokurorluğu və Daxili İşlər Nazirliyinin Baş Cinayət Axtarışı İdarəsi əməkdaşlarının yerli polis və prokurorluq orqanları ilə birgə yüksək peşəkarlıqla həyata keçirdikləri istintaq və əməliyyat–axtarış tədbirləri nəticəsində müəyyən edilərək həbs olunmuşdur. Ondan zərərçəkənlərə məxsus qızıl-zinət əşyaları, mənzilin açarı, mobil telefon və başqa maddi sübutlar götürülərək cinayət işinə əlavə olunmuşdur.

Xüsusi amansızlıqla törədilmiş daha bir qəsdən adamöldürmə hadisəsi 2004-cü il iyunun 15-də Bərdə rayonunda baş vermişdir. Alınmış məlumata əsasən, hadisə yerinə gəlmiş əməliyyat-istintaq qrupu aşkar etmişdir ki, rayonun Kətəlparaq kənd sakini Sənani Abuzərov çoxsaylı bədən xəsarətləri ilə öz evində öldürülmüşdür.

Daxili İşlər Nazirliyi Baş Cinayət Axtarışı İdarəsinin, yerli polis şöbəsinin, respublika və rayon prokurorluqlarının təcrübəli əməkdaşlarından ibarət əməliyyat-istintaq qrupunun həyata keçirdiyi tədbirlərlə bu cinayətin də açılması təmin edilmişdir. Qısa müddət ərzində hadisənin həmin kənddə məskunlaşmış Ağdam rayonundan olan məcburi köçkünlər Elnur Yəhyayev və Orxan Aslanov tərəfindən tamah məqsədi ilə törədildiyi müəyyən edilmiş və onların barələrində həbs qətimkan tədbiri seçilmişdir.

Bu il iyulun 2-də xüsusi amansızlıqla qətlə yetirilmiş Lənkəran şəhər sakini Xuraman Kərimovanın qatili də yerli pois şöbəsi və prokurorluğun əməkdaşlarının həyata keçirdikləri tədbirlər sayəsində yaxalanmışdır. İntensiv surətdə aparılan istintaq-əməliyyat tədbirləri nəticəsində hadisənin həmin rayonun sakini, əvvəllər məhkum olunmuş Ərəstun Ocaqov tərəfindən qisas almaq məqsədi ilə törədildiyi müəyyən edilərək, onun haqqında həbs qətimkan tədbiri seçilmişdir. Cinayətin törədilməsində istifadə olunmuş maddi sübutlar - bıçaq, əlcək, paltar və sair əşyalar götürülmüşdür.

2004-cü il iyulun 19-na keçən gecə baş vermiş qəsdən adamöldürmə cinayətinin üstü Bakının Səbail Rayon Polis İdarəsi əməkdaşlarının da yüksək peşəkarlıqla həyata keçirdikləri əməliyyat-axtarış tədbirləri nəticəsində “isti izlərlə” açılmışdır. Bakının Badamdar qəsəbəsində yaşadıqları mənzildə, 1935-ci il təvəllüdlü Roza Korjakovskayaya çoxsaylı bıçaq zərbələri yetirmiş, qızı İrina və nəvəsi Laləni isə xüsusi amansızlıqla öldürmüş Emin Qədimov və Maqomed Xasiyev həbs olunmuşlar.

İdarənin əməkdaşları, həmçinin, xarici ölkə vətəndaşlarına qarşı törədilmiş quldurluq hadisələrinin də açılmasını təmin etmişlər. İyulun 17-də, gecə saat 2 radələrində naməlum iki şəxs paytaxtın Hüsü Hacıyev küçəsində “Britiş Petroleum Emik” şirkətinin işçisi, Böyük Britaniya vətəndaşı Def Georgi Aleksandra qarşı zor tətbiq edərək 300 min manat pulunu və mobil telefonunu almışlar.

Hadisəni törətmiş Fuad Məmmədov və Rauf Hənifəyev elə həmin gün həbs olunaraq, cinayət məsuliyyətinə cəlb edilmişlər. Yaxalanan zaman Fuad Məmmədov bıçaqla polis əməkdaşına onun həyatı üçün təhlükəli olan xəsarətlər yetirmişdir.

Aparılan əməliyyat tədbirləri ilə müəyyən edilmişdir ki, onlar iyulun 9-da “Pasko” şirkətinin direktoru, Böyük Britaniya vətəndaşı Rəsul Elçi Mustafaya qarşı da quldurluq edərək 400 ABŞ dollarını və 350 min manat pulunu almışlar.

Bundan üç gün sonra isə həmin şəxslər saat 23.00 radələrində Üzeyir Hacıbəyov küçəsində “İMC KONSALTİNQ” şirkətinin eksperti, İrlandiya vətəndaşı Donald Ulizinə zor tətbiq edərək mobil telefonunu, “Kompakt” kompüterini, bank kartını və pullarını qarət etmişlər.

Cari ilin iyun ayının sonlarında Daxili İşlər Nazirliyi Baş Cinayət Axtarışı və Mütəşəkkil Cinayətkarlıqla Mübarizə İdarələrinin, Gəncə şəhər polisinin, Baş Prokurorluğun Ağır Cinayətlərə Dair İşlər üzrə İstintaq İdarəsi ilə birgə həyata keçirdikləri tədbirlərlə 2001-2004-cü illər ərzində Azərbaycanda və Rusiya Federasiyasının ərazisində törədilmiş 12 adamöldürmə cinayətinin açılması və həmin əməlləri törədənlərdən 13 nəfərin həbs olunması barədə ətraflı məlumat verilmişdir.

Respublikanın Baş Prokurorluğu və Daxili İşlər Nazirliyi tərəfindən Rusiyanın hüquq mühafizə orqanları ilə bilavasitə qarşılıqlı əlaqədə həmin cinayətlərin törədilməsində şübhəli olan Ovik Manuçaryan, Dünyamin Aşurbəyov və Sadiq Əliyevin də tutulması təmin olunmuşdur. Hazırda bu şəxslərin həmin cinayətlərdə iştirakı istintaq yolu ilə araşdırılır. O da müəyyən edilmişdir ki, cinayətkar dəstənin üzvlərindən Raul və Pərviz Məmmədovla Moskvanın Lyublinsk rayonu ərazisində Samux rayon sakini 23 yaşlı Eyyub Babayevi odlu silahla qətlə yetirmişlər.

İstintaq yolu ilə Raul Məmmədovun 2003-cü il fevralın 2-də Moskvanın “Kuzminka” bazarında həmyerlisi, Gəncə sakini Salman Salmanovu odlu silahla öldürməsi faktı da müəyyən edilmişdir.

Bu cinayətkar dəstənin üzvlərindən Eşqin Quliyev, Zöhrab Şükürov, İlham Qorçiyani və Samir Əhmədov da həbs edilmiş, hadisələrdə bilavasitə iştirakı sübuta yetirilmiş daha 11 nəfər haqqında həbsli axtarış elan olunmuşdur.

Respublika Baş Prokurorluğunun və Daxili İşlər Nazirliyinin əməkdaşları iki il əvvəl törədilmiş və bağlı qalmış daha bir cinayət hadisəsinin üstünü də açmışlar.

2002-ci il iyulun 24-də Hövsan qəsəbəsi ərazisində, üzərində zorakılıq əlamətləri olan kişi meyiti aşkar olunmuş və onun Bakının Nizami küçəsindəki “Ziba” mağazasının sahibi İsah Aydınov olması müəyyən edilmişdi. Keçirilmiş istintaq əməliyyat tədbirləri ilə, cinayətin həmin mağazanın satıcısı Sevda Rufullayeva tərəfindən törədilməsi sübuta yetirilmiş və 2004-cü il iyulun 20-də o, təqsirləndirilən şəxs qismində məsuliyyətə cəlb olunaraq barəsində həbs qətimkan tədbiri seçilmişdir.

Son günlər ictimai əks-səda doğurmuş adam oğurluğu faktının da üstü açılmışdır. 2004-cü il iyulun 19-da Novxanı bağları sahəsindən Binəqədi rayon icra hakimiyyətinin işçisi Eldar Məmmədov 3 nəfər naməlum şəxs tərəfindən yaxınlarından külli miqdarda pul almaq məqsədi ilə oğurlanmışdır.

Bu ağır cinayəti törətmiş Azər Dilbazi, Rəşad Şamilzadə və Pərvin Qasımov Bakı Baş Polis İdarəsinin şəhər prokurorluğu və milli təhlükəsizlik orqanları ilə birgə həyata keçirdiyi əməliyyat axtarış tədbirləri nəticəsində həbs olunmuş və Şamaxı rayonunun Yuxarı Çabani kəndində Azər Dilbazinin ailəsinə məxsus bağ evində saxlanılan Eldar Məmmədov azad edilmişdir. Cinayətkar qrupun digər üzvlərinin tutulması üçün tədbirlər görülür.

Yuxarıda göstərilən bütün faktlar üzrə cinayət işləri başlanmışdır, istintaq aparılır.

Respublikanın hüquq mühafizə orqanları cinayətlərin qarşısının alınması və açılması, cinayətkarların ifşa edilərək ədalət mühakiməsinə cəlb olunması istiqamətində qanunvericiliklə müəyyən edilmiş vəzifələrini bundan sonra da yüksək peşəkarlıqla yerinə yetirəcək, Azərbaycan Respublikası Prezidentinin fərman və sərəncamlarını, tələb və tövsiyələrini rəhbər tutaraq insanların həyatının hüquqazidd əməllərdən qorunması və asayişin etibarlı təmin edilməsi işini qətiyyətlə həyata keçirəcəklər.