“Azərbaycanın kəşfi: biznes imkanlarının yunan ictimaiyyətinə tanıdılması” adlı biznes forum keçirilib
Bakı, 30 yanvar, AZƏRTAC
Afinada Yunanıstan Sahibkarlar Federasiyası, Yunanıstan Milli İnvestisiya və Ticarətin Təşviqi Agentliyi və Azərbaycanın bu ölkədəki səfirliyinin birgə təşkilatçılığı ilə “Azərbaycanın kəşfi: biznes imkanlarının yunan ictimaiyyətinə tanıdılması” adlı biznes forum keçirilib. Forumda ölkəmizi Kənd Təsərrüfatı Nazirliyinin tabeliyində olan Aqrar Tədarük və Təchizat ASC və Azərbaycanda İxracın və İnvestisiyaların Təşviqi Fondu (AZPROMO) təmsil edib.
Aqrar Tədarük və Təchizat ASC-dən AZƏRTAC-a bildirilib ki, forumun açılış mərasimində Yunanıstan Sahibkarlar Federasiyasının vitse-prezidenti Konstantinos Bitsios, Milli İnvestisiya və Ticarətin Təşviqi Agentliyinin icraçı direktoru Georgios Filiopulos, Azərbaycanın Yunanıstandakı səfiri Anar Hüseynov çıxış edib, iki ölkə arasında siyasi-iqtisadi əlaqələrin hazırkı vəziyyəti və perspektivləri barədə fikirlərini bölüşüblər. Bildirilib ki, keçirilən bu tədbirlər hər iki ölkənin biznes strukturlarının nümayəndələrinə mövcud imkanlar barədə daha çox məlumat paylaşılmasına və gələcək əməkdaşlıqların qurulmasına zəmin yaradır.
Forum çərçivəsində təşkil edilən “Azərbaycanda biznes mühiti” panelində Aqrar Tədarük və Təchizat ASC İdarə Heyətinin sədri Leyla Məmmədova təqdimatla çıxış edib, ölkəmizdə kənd təsərrüfatı sahəsində aparılan islahatlar və aqrar sahənin inkişafında həyata keçirilən işlər barədə məlumat verib. Bildirib ki, yerli məhsulların tanıdılmasında bu cür biznes missiyaların əhəmiyyəti böyükdür: “Yunanıstan da Azərbaycan kimi kənd təsərrüfatı sahəsinə xüsusi diqqət ayırır. Bu oxşar cəhət ölkələrimiz arasında aqrar sahədə daha sıx əməkdaşlıq üçün zəmin yaradır. Hazırda Azərbaycanda bu sahədə aparılan islahatlar və dövlətin xüsusi diqqəti nəticəsində kənd təsərrüfatı dayanıqlı inkişaf gedir. Azərbaycanın ixrac potensialı hər il artmaqdadır. Azərbaycan istehsalı olan kənd təsərrüfatı məhsullarını həm təzə halda, həm də emal olunmuş şəkildə idxal etmək mümkündür. Biz Yunanıstanın Azərbaycan məhsullarının ixrac olunduğu ölkələr sırasında xüsusi yer tutmasını istəyirik. Ümid edirəm ki, həyata keçirdiyimiz bu biznes missiya uğurlu olacaq və ölkələrimiz arasında yeni işgüzar əməkdaşlıqlara öz töhfəsini verəcək”.
Forumda iştirak edən yunan sahibkarlarına müraciət edən Leyla Məmmədova onları Azərbaycanda aqrar sahəyə investisiya yatırmağa çağırıb. Bildirib ki, ölkəmizdə investisiya üçün əlverişli mühit var və dövlət tərəfindən mütəmadi olaraq biznes və investisiya mühitinin daha da yaxşılaşdırılması istiqamətində müxtəlif tədbirlər həyata keçirilir.
Paneldə AZPROMO prezidentinin müşaviri Fuad Pənahov da çıxış edib, Azərbaycanın biznes mühiti və ixrac potensialı barədə ətraflı məlumat verib.
Daha sonra baş tutan “Azərbaycanla biznes əlaqələri qurmuş şirkətlər” panelində isə hazırda Azərbaycanda birbaşa və yerli şirkətlərlə əməkdaşlıq çərçivəsində fəaliyyət göstərən yunan şirkətlərinin nümayəndələri çıxış edib, biznes üçün niyə məhz Azərbaycanı seçdikləri və gələcək əməkdaşlıq perspektivləri barədə fikirlərini bölüşüblər.
Qeyd edək ki, biznes forumun təşkilində əsas məqsəd hər iki ölkənin müvafiq dövlət və özəl biznes strukturları arasında ticarət əlaqələrinin genişləndirilməsi, yeni investisiya imkanların araşdırılması, yeni işgüzar əməkdaşlıqların qurulmasıdır. Forum çərçivəsində təşkil edilən sərgidə Kənd Təsərrüfatı Nazirliyinin tabeliyində olan Aqrar Tədarük və Təchizat ASC tərəfindən yerli fermer məhsullarının tanıdılması məqsədilə zəfəran, zəfəran cemi, çay, bal, düyü, şərab, xurma, nar şərab, fındıq, müxtəlif mürəbbələr, eləcə də “Kənddən Şəhərə” brend adı altında qablaşdırılan Zaqatala çayı, düyü unu, düyü, noxud, bal və digər qida məhsullarının sərgi və dequstasiyası da təşkil olunub.
Bölmənin digər xəbərləri
