AZƏRBAYCANIN SEÇKİLƏR MƏCƏLLƏSİNİN LAYİHƏSİ MÜZAKİRƏ OLUNMUŞDUR
Dekabrın 12-də Məzahir Pənahovun sədrliyi ilə Mərkəzi Seçki Komissiyasının növbəti iclası olmuşdur. İclasda Mərkəzi Seçki Komissiyasına təqdim olunmuş “Azərbaycan Respublikasının seçkilər məcəlləsi”nin layihəsi barədə komissiya üzvlərinin fikirləri dinlənilmiş və sənəd yüksək dəyərləndirilmişdir.
Mərkəzi Seçki Komissiyasından AZƏRTAC-a bildirmişlər ki, komissiyanın sədri və üzvləri seçki, referendum və komissiyalar haqqında qanunvericilik aktlarını özündə cəmləşdirən Məcəllə layihəsini şəffaf, demokratik seçkilər keçirilməsi üçün zəruri olan beynəlxalq seçki standartlarından irəli gələn tələblərə uyğun hazırlanmış böyük əhəmiyyətli, təqdirəlayiq sənəd kimi qiymətləndirmişlər. Bu mühüm sənədi dərindən və səriştəli öyrənmək üçün kifayət qədər vaxta malik olan komissiya üzvləri Məcəllənin praktiki tətbiqi, yazılış üslubu və digər cəhətləri ilə bağlı təkliflərini irəli sürmüşlər. Məcəllə layihəsinin müzakirəsinin və yeni təkliflər əsasında təkmilləşdirilməsinin davam etdirilməsi vacib sayılmışdır.
İclasda 91 saylı Xanlar-Daşkəsən dairə seçki komissiyasının üzvü Z.İ.İsmayılovun komissiya üzvlüyündən azad olunması barədə Mərkəzi Seçki Komissiyasına ərizə ilə müraciət etdiyi bildirilmiş və müvafiq qərar verilməsi üçün məsələnin ətraflı araşdırılması vacib bilinmişdir.
Komissiyanın işində kütləvi informasiya vasitələnin nümayəndələri iştirak etmişdir.
Bölmənin digər xəbərləri
