AZƏRBAYCANIN SƏHİYYƏ NAZİRİ İRANDA BİR SIRA GÖRÜŞLƏR KEÇİRMİŞDİR
Tehranda səfərdə olan Azərbaycanın səhiyyə naziri Əli İnsanov bir sıra görüşlər keçirmişdir. Səhiyyə Nazirliyindən AZƏRTAC-ın müxbirinə bildirmişlər ki, “İmdad” komitəsinin sədri Seyid Rza Nəiri ilə görüşdə məmnunluqla qeyd edilmişdir ki, dünyanın müxtəlif ölkələrində 7 milyon adama humanitar yardım göstərən bu komitənin Azərbaycanla da hərtərəfli əlaqələrini genişləndirmək üçün lazımi şərait vardır. Səhiyyə naziri Əli İnsanovu İranın birinci vitse-prezidenti Məhəmməd Rza Arif də qəbul etmişdir. O, öz ölkəsinin Azərbaycanla elmi-texniki sahədə, təbabət və əczaçılıq sahələrində əməkdaşlığa hazır olduğunu bildirmişdir. Ölkələrimiz arasında münasibətlərdə mövcud olan imkanlardan xalqlarımızın rifahı naminə istifadə etməyin zəruriliyi qeyd olunmuşdur. Əli İnsanov isə Azərbaycanın İranla əməkdaşlığın inkişafına maraq göstərdiyini vurğulamışdır.
Bölmənin digər xəbərləri
