AZƏRBAYCANIN SOSİAL QANUNVERİCİLİK SAHƏSİNDƏ ZƏNGİN TƏCRÜBƏSİ VARDIR
AZƏRTAC xəbər verir ki, Pakistan İslam Respublikası Senatının xarici əlaqələr komitəsinin sədri Müşahid Hüseyn Səid iyulun 7-də Milli Məclisin sosial siyasət daimi komissiyasının üzvləri ilə görüşmüşdür.
Komissiyanın sədri Hadi Rəcəbli demişdir ki, Azərbaycan müstəqilliyini bərpa etdikdən sonra bir sıra sosial problemlərlə üzləşmişdir. Lakin xalqımızın ümummilli lideri Heydər Əliyevin rəhbərliyi altında həyata keçirilən islahatlar nəticəsində ölkəmiz sürətlə inkişaf etmiş və problemlərin həllinə nail olunmuşdur.
Milli Məclis də mükəmməl qanunlar hazırlamaqla bu işdə yaxından iştirak edir. Parlamentin sosial siyasət daimi komissiyası qanunvericilik bazasının yaradılmasında beynəlxalq təcrübəni diqqətlə öyrənir, səhiyyə, idman, turizm, uşaq və gənclər, ailə məsələlərinə dair qanunlar hazırlayır. Komissiyanın hazırladığı və Milli Məclis tərəfindən qəbul olunmuş iki qanun hazırda MDB-də model qanun kimi istifadə edilir.
Müşahid Hüseyn Səid komissiyanın və ümumilikdə Milli Məclisin fəaliyyətindən razılığını bildirmişdir. Qonaq demişdir ki, Azərbaycanda sosial sahədə atılan addımlar, parlamentin qəbul etdiyi qanunlar təqdirəlayiqdir. Bu sahədə təcrübə mübadiləsinə ehtiyac olduğunu vurğulayan qonaq, bunun üçün qarşılıqlı səfərlərin təşkilinin vacibliyini qeyd etmişdir.
Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
######
Bölmənin digər xəbərləri
