AZƏRBAYCANLA İRAN ARASINDA ENERJİ MÜBADİLƏSİNİN HƏCMİ ARTIRILACAQDIR

13.01.2006 [19:35]
Çap et
A⁺ A^-

“Azərenerji” Səhmdar Cəmiyyətinin mətbuat xidmətindən AZƏRTAC-a bildirmişlər ki, Azərbaycanın İranla enerji mübadiləsinin həcminin artırılması layihəsi çərçivəsində iki ölkə mütəxəssislərinin növbəti görüşü keçirilmişdir.

Qonşu ölkə ilə enerji mübadiləsinin 700 meqavata çatdırılması üçün 330 kilovoltluq Əli Bayramlı DRES-İmişli, ikinci İmişli-Parsabad, 220 kilovoltluq Əli Bayramlı DRES-Salyan, Salyan-Masallı, Masallı-Astara elektrik ötürmə xətləri çəkiləcək, habelə “Salyan” yardımçı stansiyası inşa ediləcək və 4 yardımçı stansiya genişləndiriləcəkdir. Bundan sonra respublikamız qış mövsümündə İrandan 400 meqavat elektrik enerjisi alacaq, habelə Naxçıvana 150 meqavat enerji ötürüləcəkdir.

Hazırda “Salyan” yardımçı stansiyasının tikintisinə başlanılmış, elektrik ötürücü xətlərinin modernləşdirilməsi üçün avadanlıq alınmışdır. İranın “Təvanir” şirkəti qonşu ölkənin ərazisində ötürücü xətlərin çəkilişi ilə bağlı müvafiq tədbirlər həyata keçirir.

Xatırladaq ki, layihənin gerçəkləşdirilməsi üçün “İran İxrac Bankı” kredit ayıracaqdır.