“AZƏRDƏMİRYOLBANK”IN AKTİVLƏRİ 200 MİLYON MANATI ÖTMÜŞDÜR
AZƏRTAC xəbər verir ki, “Azərdəmiryolbank” ASC ilin birinci yarısı üçün maliyyə fəaliyyətinə yekun vurmuşdur. Bank beynəlxalq əməkdaşlığı genişləndirmək, idarəçiliyi təkmilləşdirmək, yeni xidmətləri tətbiq etməklə hesabat dövründə yüksək inkişaf dinamikasını qorumuşdur.
Yanvar-iyun aylarında bankın aktivləri 52,7 milyon manat çoxalaraq 200,2 milyon manata çatmış, illik kəsirdə artım 78 faiz təşkil etmişdir. Müştərilərin kreditləşməsinə 153,2 milyon manat sərf olunmuşdur. Bunun 3,5 milyon manatı maliyyə lizinqi əməliyyatlarının payına düşmüşdür. Əsas vəsaitlərin və qeyri-maddi aktivlərin dəyəri iyulun 1-nə 11,3 milyon manata çatmışdır.
“Azərdəmiryolbank”ın öhdəlikləri birinci yarımillikdə 167,4 milyon, maliyyə sektoru qarşısında öhdəlikləri 89,6 milyon, depozit çantası 61,5 milyon, o cümlədən müddətli əmanətləri 38,9 milyon, məcmu kapitalı 32,8 milyon manat, nizamnamə fondu 13,3 milyon, balans mənfəəti 6,2 milyon, gəlirləri 19 milyon, xərcləri isə 12,8 milyon manat olmuşdur.
