“Azəri Mərkəzi Şərqi” layihəsi üzrə payaların ilin sonlarınadək dənizdə quraşdırılması planlaşdırılır
Bakı, 6 fevral, AZƏRTAC
“Azəri-Çıraq-Günəşli” (AÇG) yataqlar blokunun işlənməsinin növbəti mərhələsi olan “Azəri Mərkəzi Şərqi” (ACE) layihəsi üzrə payaların cari ilin sonlarınadək dənizdə quraşdırılması nəzərdə tutulur.
“BP Azerbaijan” şirkətindən AZƏRTAC-a bildirilib ki, ötən ilin aprelində “Azəri Mərkəzi Şərqi” layihəsinə sanksiya verilib. Altı milyard dollar dəyərində olan bu işlənmə layihəsinə yeni dəniz platforması və qurğularının inşası daxildir. Platforma gündəlik 100 min barrelədək neft hasil etmək gücündə layihələndirilib və istismar müddəti ərzində onun 300 milyon barrelədək əlavə neft hasil edəcəyi gözlənilir. Layihə çərçivəsində ilk hasilatın 2023-cü ildə əldə ediləcəyi planlaşdırılır.
2019-cu ildə bu layihə üzrə əsas tikinti-quraşdırma, dəniz və sualtı işlər üzrə müqavilələr bağlanıb və iyulda tikinti işlərinə başlanıb. Tikinti işləri ilin ikinci yarısında genişlənməyə davam edib.
Hazırda platformanın üst modulları və qazma qurğusunun tikinisi və quraşdırılması Bibiheybətdəki tikinti-quraşdırma sahəsində plan üzrə irəliləyir, dayaq bloku və onun payalarının tikintisi Heydər Əliyev adına Bakı dərin özüllər zavodunda qrafiki qabaqlamaqla davam edir. Payaların bu ilin sonlarına yaxın dənizdə quraşdırılması planlaşdırılır. Yaşayış blokunun tikintisi İsveçdə qrafiki qabaqlamaqla irəliləyir. Sualtı boruların örtüklənməsi işləri üzrə sınaqlar başlanıb.
Bölmənin digər xəbərləri
