“Azəriqaz” İstehsalat Birliyində ödənişin səviyyəsi yüksək olaraq qalır
Bakı, 15 noyabr (AZƏRTAC). Cari ilin 10 ayı ərzində ARDNŞ-in “Azəriqaz” İstehsalat Birliyi (İB) tərəfindən əhali sektoruna 1 591 261 346 kubmetr həcmində təbii qaz satılmış və qarşılığında 104,42 faiz vəsait toplanmışdır.
İB-nin mətbuat xidmətindən AZƏRTAC-a bildirmişlər ki, cari ilin oktyabr ayı ərzində 127 210 323 kubmetr təbii qaz satılmış və qarşılığında 109,7 faiz vəsait toplanmışdır. Vəsaitin toplanmasındakı yüksək faiz göstəricisi onunla əlaqədardır ki, 2012-2013-cü illərin payız-qış mövsümündə tələbatın artmasına görə əhaliyə satılan qazın həcmi çoxalmış və bu səbəbdən də istehlak edilmiş qazın dəyəri abonentlər tərəfindən tam ödənilməmişdir. Həmin dövr ərzində yaranmış debitor borclar 2013-cü ilin yaz-yay mövsümündən başlayaraq abonentlər tərəfindən ödənilməkdədir. Nəticədə 2013-cü ilin oktyabr ayı ərzində debitor borc 2,1 faiz azalmışdır. 1 yanvar 2013-cü il tarixə mövcud olan debitor borc isə 10 ay ərzində 14,2 faiz azalmışdır.
Qeyd etmək lazımdır ki, 2013-cü il noyabrın 1-ə olan məlumata görə, əhali sektoru üzrə 108 339 məcburi köçkün ailəsi fasiləsiz təbii qazla təmin olunmaqdadır.
Bölmənin digər xəbərləri
