AzMİU-nun proqramları QS 2027 reytinqlərində yüksək nəticələr göstərib
Bakı, 16 sentyabr, AZƏRTAC
Azərbaycan Memarlıq və İnşaat Universitetinin (AzMİU) bir sıra təhsil proqramları “QS Business Master’s Rankings 2027” və “QS Global MBA Rankings 2027” beynəlxalq reytinqlərində qiymətləndirilib. Reytinq nəticələrində AzMİU-nun marketinq, maliyyə, menecment, biznes analitikası, təchizat zəncirinin idarə edilməsi və MBA istiqamətləri üzrə proqramlarının göstəriciləri əks olunub.
Universitetdən AZƏRTAC-a bildirilib ki, əldə olunan nəticələr proqramların məzunların əmək bazarında rəqabət qabiliyyəti, peşəkar nəticələri, akademik və intellektual potensialı, müxtəliflik və inklüzivlik, gender balansı, eləcə də təhsilə qoyulan investisiyanın iqtisadi səmərəliliyi kimi müxtəlif meyarlar üzrə göstəricilərini əks etdirir.
“QS Business Master’s Rankings 2027” və “QS Global MBA Rankings 2027” nəticələrinə əsasən, AzMİU-nun altı təhsil proqramı beynəlxalq reytinqlərdə təmsil olunub. Biznes analitikası, Maliyyə, Menecment və Marketinq proqramları qlobal reytinqdə 201+ kateqoriyasında yer alıb. Proqramların müxtəliflik və inklüzivlik, gender nisbəti, məşğulluq, məzunların peşəkar nəticələri və digər göstəricilər üzrə nəticələri qiymətləndirilib. AzMİU-nun Beynəlxalq MBA proqramı isə QS Global MBA Rankings 2027-də 301+ kateqoriyasında qərarlaşıb. Proqram Avropa üzrə 113 proqram arasında 92-ci yeri tutub. Məzunların peşəkar nəticələri, işlə təmin olunma və müxtəliflik və inklüzivlik göstəriciləri üzrə də reytinqdə yer alıb.
Ayrı-ayrı göstəricilər üzrə proqramlar yüksək nəticələr nümayiş etdirib. Bəzi istiqamətlər üzrə 100/100 bal, o cümlədən tələbələrin və professor-müəllim heyətinin gender nisbəti, məşğulluq və elmi dərəcəli əməkdaşların payı üzrə maksimum nəticələr əldə olunub. Nəticələr AzMİU-nun biznes və idarəetmə sahəsindəki təhsil proqramlarının beynəlxalq reytinqlərdə təmsil olunduğunu və müxtəlif qlobal qiymətləndirmə meyarları üzrə nəticələr nümayiş etdirdiyini göstərir.
Reytinq nəticələrində məzunların işlə təmini, peşəkar nəticələri, müxtəliflik və inklüzivlik, professor-müəllim heyətinin akademik kvalifikasiyası, gender balansı, sahibkarlıq potensialı və təhsilin iqtisadi səmərəliliyi kimi istiqamətlər üzrə əldə olunan göstəricilər əks olunub.
Qeyd edək ki, bu nəticələr AzMİU-nun təhsil proqramlarının beynəlxalq qiymətləndirmə meyarlarına uyğunluğu və universitetin qlobal təhsil məkanında beynəlxalq çəkisinin artırılması istiqamətində həyata keçirilən fəaliyyətin göstəricisidir.
Bölmənin digər xəbərləri
