Bakı Dövlət Universitetində icbari tibbi sığorta ilə bağlı infosessiya
Bakı, 4 may, AZƏRTAC
Bakı Dövlət Universitetinin (BDU) Tələbə Gənclər Təşkilatının təşkilatçılığı ilə İcbari Tibbi Sığorta üzrə Dövlət Agentliyinin əməkdaşları tərəfindən tələbələr üçün infosessiya keçirilib.
Bu barədə AZƏRTAC-a BDU-dan məlumat verilib.
Tədbirdə çıxış edən BDU-nun Humanitar məsələlər və gənclər siyasəti şöbəsinin müdiri Ramin Səmədov İcbari Tibbi Sığorta üzrə Dövlət Agentliyinin fəaliyyət istiqamətləri haqqında məlumat verib. Diqqətə çatdırılıb ki, Azərbaycanda əhalinin sağlamlığının qorunması və zəruri tibbi xidmətlərin göstərilməsi işini təkmilləşdirmək məqsədilə 2021-ci ildən etibarən icbari tibbi sığorta sistemi tətbiq olunur. Hər bir vətəndaş sistemdən yararlanmaqla keyfiyyətli tibbi xidmətdən istifadə edə bilər. Bu baxımdan müvafiq hədəf qrupları, o cümlədən tələbələrlə maarifləndirmə işlərinin aparılması olduqca əhəmiyyətlidir.
İcbari Tibbi Sığorta üzrə Dövlət Agentliyinin şöbə müdiri Pərvin Baxşəliyeva, əməkdaşı Fuad Bayramov tərəfindən icbari tibbi sığortaya müraciət və istifadə qaydaları, icbari tibbi sığortanın xidmətlər zərfinə daxil olan xidmətlər haqqında təqdimatlar edilib.
Sonra tələbələrin sualları cavablandırılıb.
Bölmənin digər xəbərləri
