MƏDƏNİYYƏT
Bakı Şəhər Mədəniyyət və Turizm İdarəsi işçilərinin II spartakiadasının qalibləri mükafatlandırılmışlar
Bakı, 30 oktyabr (AZƏRTAC). Mərdəkan Mədəniyyət Sarayında Bakı Şəhər Mədəniyyət və Turizm İdarəsinin (BŞMTİ) şəbəkəsinə daxil olan mədəniyyət müəssisələri işçilərinin ümummilli lider Heydər Əliyevin anadan olmasının 90 illik yubileyinə həsr edilmiş II spartakiadasının yarımfinal və final mərhələsi keçirilmişdir.
AZƏRTAC xəbər verir ki, dama, stolüstü tennis, nərd, kəndirdartma, güllə atıcılığı, bilyard və digər idman növləri üzrə keçirilən spartakiadanın ümumi xal hesabı ilə qalibi Xəzər rayonunun komandası olmuşdur.
Mükafatlandırma mərasimində Bakı Şəhər İcra Hakimiyyəti başçısının müavini Fidumə Hüseynova spartakiadanın əhəmiyyətindən danışmış və qalibləri təbrik etmişdir.
Bildirmişdir ki, bu spartakiada əhalinin mənəvi və fiziki sağlamlığının möhkəmləndirilməsi, bütün yaş qruplarının sağlam həyat tərzinə cəlb olunması, bədən tərbiyəsi və idman qurğularından səmərəli istifadə edilməsi məqsədi ilə həyata keçirilir.
Sonra qaliblərə və yaxşı nəticə göstərənlərə BŞMTİ-nin diplomları və qiymətli hədiyyələr təqdim olunmuşdur.
BŞMTİ-nin şəbəkəsinə daxil olan mədəniyyət müəssisələri işçilərinin I spartakiadası 2012-ci ildə keçirilmişdir. Böyük marağa səbəb olmuş və əsl bayrama çevrilmiş spartakiadanın hər il keçirilməsi qərara alınmışdır.