BAKIDA 1-Cİ AZƏRBAYCAN BEYNƏLXALQ SIĞORTA FORUMU KEÇİRİLİR
AZƏRTAC xəbər verir ki, iyulun 10-da Bakıda, “Crescent Beach” hotelində Maliyyə Nazirliyinin dəstəyi və Azərbaycan Sığortaçılar Assosiasiyasının (ASA) təşkilatçılığı ilə 1-ci Azərbaycan Beynəlxalq sığorta forumu işə başlamışdır.
Tədbirdə dünyanın 15 ölkəsindən, o cümlədən Türkiyə, Bolqarıstan, Ukrayna, Avstriya, Böyük Britaniya, Rusiya, Fransa, Almaniya, Polşadan 100-dən çox nümayəndə iştirak edir.
ASA-nın və “Standard İnsurance” şirkəti idarə heyətinin sədri Kamal İbrahimov tədbirin Azərbaycanın sığorta bazarının inkişaf tendensiyalarına, Avropa ölkələrinin sığorta bazarlarındakı təcrübələrinin respublikamızın sığorta sektorunun inkişafına təsirinə, həyat sığortasının inkişaf etdirilməsi proqramlarına, ölkəmizin sığorta bazarının sistemli təhlilinə və sığortada korporativ idarəetməyə həsr olunduğunu söyləmişdir.
Forumun məqsədi Azərbaycanın sığorta bazarı haqqında məlumat vermək, beynəlxalq sığorta xidmətləri bazarında inteqrasiya prosesini inkişaf etdirmək, dünya sığorta birliklərinin iştirakçılarını birləşdirmək, təcrübə mübadiləsi aparmaq, sığortaçıların iş görüşlərini və tərəfdaşlıq münasibətlərini genişləndirməkdir.
Sığortanın Azərbaycanda 150 illik tarixi barədə qısa məlumat verən maliyyə naziri Samir Şərifov, XX əsrin sonlarında müstəqilliyini bərpa etmiş ölkəmizdə qazanılmış uğurlardan və sığortanın inkişaf meylindən danışmışdır. Nazir bildirmişdir ki, 1994-cü ildən başlayaraq dünyanın aparıcı neft şirkətləri ilə Azərbaycanda neft-qaz layihələrinə 60 milyard ABŞ dolları məbləğində investisiya yatırımlarını nəzərdə tutan 21 müqavilənin bağlanması respublikanın sığorta bazarının inkişafına güclü təkan vermişdir. Böyük məbləğli investisiyalar, işlərin aparılmasının beynəlxalq standartları, çoxlu sayda podratçıların ölkəmizə gəlişi sığorta xidmətlərinə olan tələbin ciddi şəkildə artmasına səbəb olmuşdur.
Bu gün Azərbaycan iqtisadiyyatı sürətli inkişaf dövrünü yaşayır. 2007-ci ildə ölkədə ümumi daxili məhsulun (ÜDM) həcmi 30 milyard dollara çatmışdır ki, bu da 2006-cı ilin göstəricisindən 25 faiz çoxdur. Qeyri-neft sektorunun artımı isə 11 faizdən çox olmuşdur. Ümumiyyətlə, ÜDM son 4 ildə təxminən iki dəfə artmışdır.
Azərbaycanın maliyyə sistemində də nəzərəçarpacaq səviyyədə irəliləyişlər olduğunu qeyd edən S.Şərifov demişdir ki, ötən il 2003-cü illə müqayisədə icmal və dövlət büdcələri xərclərinin dəfələrlə, dövlət investisiya qoyuluşu həcminin isə 20 dəfədən çox artmasına baxmayaraq, dövlətin məcmu valyuta ehtiyatlarının davamlı yüksəlişi təmin edilmiş və onların məbləği 4,5 dəfə çoxalaraq 7 milyard dolları keçmişdir. Bu gün Azərbaycanın valyuta ehtiyatlarının məbləği 10 milyard dollardan çoxdur. İlin sonunadək bu məbləğin 20 milyard dollar olacağı proqnozlaşdırılır.
Ölkədə sığortanın fəaliyyətindən bəhs edən maliyyə naziri, 2007-ci ildə ümumi sığorta haqları həcminin 60 faiz artaraq, 150 milyon manat təşkil etdiyini diqqətə çatdırmışdır. Bu ilin birinci rübündə isə sığorta haqlarının məbləği 35 faiz çoxalmışdır. 2003-2007-ci illərdə sığortaçıların ümumi nizamnamə kapitallarının həcmi 3,5 dəfə yüksələrək 18,4 milyon manatdan 63,4 milyon manata çatmışdır.
Samir Şərifov Azərbaycanda sığorta bazarının inkişafı və sığorta qanunvericiliyinin təkmilləşdirilməsi istiqamətində görülmüş işlərdən də danışmışdır.
İqtisadi inkişaf naziri Heydər Babayev xalqımızın ümummilli lideri Heydər Əliyevin rəhbərliyi altında başlanmış iqtisadi islahatların Azərbaycan Prezidenti İlham Əliyev tərəfindən uğurla davam etdirilməsi nəticəsində ölkənin sosial-iqtisadi həyatının bütün istiqamətləri üzrə əldə olunmuş böyük uğurlar barədə məlumat vermişdir. Bildirmişdir ki, həyata keçirilən kompleks tədbirlər 2008-ci ilin ötən dövründə də iqtisadi uğurların qazanılmasına, eləcə də əldə olunmuş nailiyyətlərin möhkəmlənməsinə zəmin yaratmışdır. 2008-ci ilin 6 ayında ÜDM-in artım sürətinə görə Azərbaycan dünya ölkələri arasında lider mövqeyini saxlamış, artım tempi 15 faiz səviyyəsində olmuşdur.
Heydər Babayev son illər Azərbaycanda həyata keçirilmiş nəhəng Bakı-Tbilisi -Ceyhan neft, Bakı-Tbilisi-Ərzurum qaz kəmərləri layihələri, icrasına başlanmış Bakı-Tbilisi-Qars dəmir yolu layihəsi barədə iştirakçılara məlumat vermişdir.
Azərbaycan iqtisadiyyatına 50 milyard dollardan çox, o cümlədən təkcə ötən il 8 milyard məbləğində investisiya yatırıldığı da bildirilmişdir. Bunun da təxminən 67,7 faizi xarici sərmayədir.
Milli Məclisin iqtisadi siyasət daimi komissiyasının sədri Ziyad Səmədzadə belə beynəlxalq tədbirlərin keçirilməsinin əhəmiyyətini vurğulamış, forumda əldə olunacaq nəticələrin Azərbaycan sığorta bazarında ciddi irəliləyişlərə səbəb olacağına əminliyini bildirmişdir.
Maliyyə Naziriliyinin şöbə müdiri Namiq Xəlilov “Azərbaycanda sığorta bazarı və sığorta fəaliyyətinin tənzimlənməsi” mövzusunda çıxış etmişdir.
Sonra “Azərbaycan sığorta bazarının inkişaf meyilləri”, “Şərqi Avropanın sığorta bazarlarının təcrübəsi və Azərbaycanda sığortanın inkişafında onun əks olunması”, “Şərqi Avropa və MDB ölkələrinin bazarlarında beynəlxalq sığorta brokerlərinin rolunun dəyişməsi”, “Azərbaycanın təkrar sığorta bazarı”, “İnkişaf etməkdə olan bazarlarda sığorta biznesinin dinamikası”, “Qloballaşma və sığorta sənayesi”, “Azərbaycanın sığorta şirkətləri üçün təkrar sığorta müdafiəsinin təşkili variantları” və s. mövzularda məruzələr dinlənilmişdir.
Forum iyulun 11-də işini davam etdirəcəkdir.
######
 |
 |
