BAKIDA 7 YANĞIN HADİSƏSİ QEYDƏ ALINMIŞDIR
Son iki gündə ayrı-ayrı mənzillərdə divar sobalarının həddindən artıq qızması, elektrik qızdırıcılarından ehtiyatsız istifadə edilməsi səbəbindən respublikada 12, o cümlədən Bakı şəhərində 7 yanğın hadisəsi qeydə alınmışdır.
Baş Dövlət Yanğın Təhlükəsizliyi İdarəsindən AZƏRTAC-a daxil olmuş məlumatda bildirilir ki, dekabrın 15-də Səbail rayonunun Azər Nəsirov küçəsindəki 34 nömrəli evdə qaz sobasının yana-yana qalması nəticəsində baş vermiş yanğın zamanı vətəndaş Qənaət Əmralıyevin ev əşyaları məhv olmuşdur. Yanğın qonşuluqda yerləşən birmərtəbəli evə keçmiş, onun dam örtüyü və tavanı tamamilə sıradan çıxmışdır.
Dekabrın 16-da Xətai rayonunun Aşıq Qurban küçəsindəki 25 nömrəli evdə Kərim Şəfaqətova məxsus 3 otaqlı mənzil yanmışdır. 70 kvadratmetr sahəni əhatə edən yanğın qaz sobasının həddən artıq qızması nəticəsində baş vermişdir.
Baş Dövlət Yanğın Təhlükəsizliyi İdarəsi əhalinin nəzərinə bir daha çatdırır ki, mənzillərin qızdırılması zamanı yanğın təhlükəsizliyi qaydalarına ciddi riayət etsinlər.
Bölmənin digər xəbərləri
