Bakı, 24 noyabr, Məmməd Məmmədli, AZƏRTAC

Hər il noyabrın sonuncu cümə axşamı günü Birləşmiş Ştatlarda Şükranlıq Gününü bayram edirlər. Bu bayramın kökləri uzaq 1621-ci ilin payızına gedib çıxır. O vaxt Plimut koloniyasının sakinləri məhsul bolluğunu üç gün bayram edərək Şükranlıq Gününün əsasını qoyublar. O vaxtdan bu bayram hər il keçirilir.

AZƏRTAC xəbər verir ki, ABŞ-ın ölkəmizdəki səfirliyində çalışan İqtisadiyyat şöbəsinin müdiri Drü Lebkuker, səfirliyin digər əməkdaşı İctimaiyyətlə əlaqələr şöbəsinin müdiri, eyni zamanda onun həyat yoldaşı Elis Spensli, qızları Luis, Ketrin və oğlu Endrü bir sıra yerli media nümayəndələrilə birlikdə Şükranlıq Gününü qeyd ediblər.

Drü Lebkuker və Elis Spensli hər bir amerikalı ailəsinin Şükranlıq bayramını böyük sevinc və hindu xalqına minnətdarlıq amalı ilə qeyd etdiklərini söyləyiblər. Bu günün tarixi məqamlarına diqqət çəkən Elis deyib ki, ingilis koloniyaları Şimali Amerikanı fəth edən zaman kütləvi aclıqla üzləşmişdilər. Çoxları ərzaq tapmadığından canını torpağa tapşırmışdı. Kolonistləri bu aclıqdan qurtaran hindu qəbilələri ovladıqları hind quşlarını onlara verərək həyatlarını xilas etmişdilər. Beləcə göydəndüşmə bir yemək bolluğu yaranmışdı. 1863-cü il oktyabrın 3-də isə Prezident Avraam Linkoln Şükranlıq Gününü dövlət bayramı elan etdi.

Şükranlıq Gününü simvolizə edən hindu quşunun hazırlanma üsulundan danışan Elis Spensli bildirib ki, yeməyin dadlı alınması üçün ətin içinə alma, armud, balqabaq və əzilmiş kartof doldurulur. Ədviyyatlardan darçın, zəncəfil, mixək, muskat qozu (hind qozu) vurulduqdan sonra sobada 160 dərəcədə bişirilir. Bu zaman ətin yumşaq qalması üçün 30 dəqiqədən bir onu sobadan çıxarıb üzərinə ətin buraxdığı suyu əndərilir, sonra isə yenidən sobaya qoyulur. Bu yolla ət 4-5 saat bişməlidir.

Daha sonra ev sahibləri süd və xama əlavə olunmuş kartof püresi, kələm, qarğıdalı və yaşıl lobya salatı, çay süfrəsi üçün isə balqabaqdan hazırlanmış növbənöv şirniyyatlar, hətta şəkərbura, paxlava süfrəyə düzüblər.

“Bu gün əlimizi süfrəyə vurmazdan öncə biz şükür edirik. Əksər amerikalı ailələr Allaha şükür edir, bəziləri onlara yardım edən insanlara, həyatdakı dostlarına, qohumlarına və daha çox valideynlərinə minnətdarlıqlarını bildirirlər”, - deyə Drü Lebkuker bu günün mahiyyətini açıqlayıb.

Süfrə ətrafında Drü Lebkuker, Elis Spensli, qızları Luis, Ketrin və oğlu Endrü qonaqlarla birlikdə Şükranlıq bayramını qeyd ediblər.

Ailəsi haqqında danışan Elis yoldaşı və 3 uşağı ilə bir ilə yaxındır ki, Azərbaycanda yaşadığını söyləyib: “Gəldiyimiz ilk gündən Azərbaycanı sevdik. Tez-tez bölgələrə səfərlər edirik. Qışda Şahdağda uşaqlarla xizək sürürük, yay aylarında isə sahilboyu ərazilərdə dənizə gedirik. Uşaqlar Bakıda məktəbdə təhsil alırlar. Məncə Azərbaycan və Amerika milli bayramları arasında bir oxşarlıq var. Təamlar fərqli olsalar belə insanları eynidir. Biz azərbaycanlı dostlarımızla dadlı yeməyi xoşlayırıq. Şükranlıq Günündəki kimi Novruz bayramında da bir yerdə yemək hazırlayır süfrə arxasında bayramı qeyd edirik. Bu, dostluq münasibətlərini qurmaq üçün çox vacibdir. Uşaqlar daha çox Azərbaycan pomidorunu, təndir çörəyini və manqal salatını bəyənirlər”.

Elis Şükranlıq Gününün bir amerikalı ailəsi üçün əziz gün olduğunu deyib: “Şükranlıq bayramı ətrafımıza baxıb əlimizdə olanlara şükür etmək məqamıdır. Misal olaraq ailədə uşaqların salamat, xoşbəxt olması, daha geniş miqyasda götürəndə, dünyada baş verənlərə baxanda başa düşürsən ki, digər ölkələr hansı çətinliklərdən keçir, Ukraynada gedən amansız müharibənin acısını çəkir. ABŞ-ın özündə yerli hindu xalqları bizə qonaqpərvərlik göstərib bizi aclıqdan xilas etdiklərini görəndə onların necə xeyirxah bir xalq olduğunu anlayırsan. Buna görə də biz ilk olaraq hindulara minnətdarıq. Amerikanın digər özəlliyi orada olan fərqli mədəniyyətlərdir. Hər bir ailənin öz mədəni irsi var. Amerikada səyahət etsəniz görərsiniz ki, hər masaya fərqli təamlar düzülür. Şükranlıq bayramını da gözəlləşdirən məhz Amerikadakı müxtəliflikdir”.

Media nümayəndələri bu qonaqpərvərliyə görə ev sahiblərinə təşəkkürlərini bildirib, süfrələrindən ruzi-bərəkətin əksik olmamasını arzulayıblar.