Bakıda bank və maliyyə ekosistemində yeni trendlər barədə müzakirələr aparılıb
Bakı, 16 iyun, AZƏRTAC
İyunun 16-da Bakıda ikigünlük “Azərbaycan Banklar Assosiasiyası” İctimai Birliyinin təşkilatçılığı ilə “Fintex Summit” - Maliyyə və Texnologiyalar Sərgisi keçirilir.
AZƏRTAC xəbər verir ki, tədbir “Bank və Maliyyə Ekosistemində Yeni Trendlər İnnovativ Həllər, Fintexlər və Təhlükəsizlik” mövzusuna həsr olunub.
Azərbaycan Banklar Assosiasiyasının sədri Zakir Nuriyev deyib ki, cari ildə həyata keçirilən əməliyyatların 69 faizi elektron daşıyıcılar vasitəsilə aparılıb. Bu da ötən ilin müvafiq dövrü ilə müqayisədə 7 faiz bəndi çoxdur. Pandemiyadan əvvəl elektron ödənişlər 4,3 milyard manat idisə, bu ilin ilk 4 ayı ərzində bu rəqəm 6 milyard manat olub. Cari ildə banklarda aparılan əməliyyatların sayca 75 faizi, həcmcə 40 faizi nağdsız hesablaşmaların payına düşür. Ən böyük artım elektron ticarətlə bağlıdır. Belə ki, 2022-ci ilin aprelində bank kartlarından elektron ticarətdə istifadə 2,8 dəfə artıb. Bank kartlarının sayı 2 milyon ədəd yaxud 22 faiz artaraq 11,9 milyona çatıb.
Ekologiya və təbii sərvətlər naziri Muxtar Babayev bildirib ki, 30 ildən sonra ərazilərimizin işğaldan azad edilməsi yeni imkanlar yaradıb. Bu ərazilərdə təmiz ətraf mühitin təmin olunması 10 ilin əsas strateji istiqamətlərindəndir. Azad edilmiş torpaqlarda “yaşıl enerji”, “yaşıl kənd təsərrüfatı”, “yaşıl texnologiya”nın tətbiqi üçün çox böyük potensial var. Bu ərazilərin bərpası zamanı müasir yanaşmaların tətbiqi gələcəkdə Qarabağın azad yaşıl zonaya çevrilməsinə gətirib çıxaracaq.
Mərkəzi Bankın baş direktoru Fərid Osmanov qeyd edib ki, 2018-ci ildə qlobal olaraq dünyada 12 min fintex təşkilatı var idisə, 2021-ci ilin əvvəlinə bu rəqəm 23 min təşkil edib. 2021-ci ildə fintex ekosisteminə qoyulmuş investisiyaların həcmi 210 milyard dollara çatıb. Ölkədaxili bu kartlarla həyata keçirilən nağdsız ödənişlərin həcmi 2,2 dəfə artaraq 8 milyard manata bərabər olub. Nağdsız ödənişlərin çəkisi kart ödənişlərində ilk dəfə 12,4 faiz bəndi artıb. Nağdsız ödənişlərin həcmində xüsusi önəm daşıyan elektron ticarətin məbləği 2,7 dəfə artaraq 6 milyard manat olub.
Rəqəmsal inkişaf və nəqliyyat nazirinin müşaviri Fərid Əhmədov vurğulayıb ki, maliyyə texnologiyalarının tətbiqi həm maliyyə bazarlarının, eyni zamanda, iqtisadiyyatın inkişafı nöqteyi-nəzərindən çox önəmlidir. Nəzərə alsaq ki, maliyyə texnologiyalarının tətbiqi və inkişafı rəqəmsal transformasiya çərçivəsində baş verir, bu da bazar subyektlərinə data toplamaq imkanları yaradır. Data əsaslı yeni məhsullar hədəflənmiş şəkildə konkret müştəri bazasına yönəlik olur. Eyni zamanda, məhsulların daha çevik şəkildə bazara çıxarılmasını təmin edir. Biz nazirlik olaraq maliyyə texnologiyalarına xüsusi önəm verməklə yanaşı, bunu digər sahələrdə texnologiyaların inkişafı ilə bərabər qiymətləndiririk.
İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru, professor Vüsal Qasımlı diqqətə çatdırıb ki, maliyyə texnologiyalarının inkişafını rəqəmsal ödənişlər, rəqəmsal sərmayə, alternativ maliyyələşdirmə, rəqəmsal aktivlər və neo-bankçılıq istiqamətində təsnifləşdirmək olar. Azərbaycanda xüsusilə rəqəmsal ödənişlərin həcmi həndəsi silsilə ilə artır. 2021-ci ilə qədər rəqəmsal ödənişlərin həcminin ikiqat artması üçün cəmi iki il tələb olunurdusa, qarşıdakı dörd ildə Azərbaycanda rəqəmsal ödənişlərin daha iki dəfə artması proqnozlaşdırılır. Maliyyə texnologiyalarının inkişafı açıq bankçılıqla əlaqədardır ki, burada da həm innovasiyaları, həm də riskləri nəzərə almaq lazımdır. Bu məsələlər Azərbaycanda “Açıq bankçılığın tətbiqi üzrə yol xəritəsi”ndə nəzərdə tutulur. Azərbaycanda tətbiqi proqramlaşdırma interfeysi üzrə (API) standartın hazırlanması və mərkəzləşdirilmiş API infrastrukturuna keçid maliyyə texnologiyalarının inkişafını daha da sürətləndirəcək. BankAPI infrastrukturunun yaradılması ilə startapların bank sektoruna inteqrasiyası təmin ediləcək.
2021-ci ildə dünyada finteks sektoruna ümumilikdə 210 milyard ABŞ dolları məbləğində investisiya yatırıldığı deyən Azərbaycan Fintex Assosiasiyasının İdarə Heyətinin sədri Ruslan Talıbov qeyd edib ki, bunun 51,7 milyard ABŞ dolları “e-tech” deyilən ödəniş sistemlərinə, 30 milyard ABŞ dolları isə kriptovalyutalar sahəsinə qoyulub.
Tədbir panel iclaslarla işini davam etdirib.
Qeyd edək ki, sammit ölkənin maliyyə-iqtisadiyyat sahəsində tənzimləyici və nəzarət orqanlarının rəhbərlərinin, kommersiya banklarının və maliyyə sektorunun digər iştirakçılarının yuxarı menecmenti, yerli və xarici biznes, həmçinin ictimai təşkilatların rəhbərləri, beynəlxalq maliyyə institutlarının və xarici ölkələrin Azərbaycandakı səfirliklərinin, akademik dairələrin nümayəndələri, maliyyə və bankçılıq sahəsinə aid məhsul və xidmətlər təklif edən xarici və yerli şirkətlərdən iştirakçıları bir araya toplayan, regionun ən nüfuzlu maliyyə və bankçılıq tədbirlərindən biridir.
Bölmənin digər xəbərləri
