BAKIDA “CƏNUBİ QAFQAZDA NARKOTİKLƏRƏ NƏZARƏT” PROQRAMI ÇƏRÇİVƏSİNDƏ TƏLİM KEÇİRİLƏCƏKDİR
Avropa İttifaqının maliyyələşdirdiyi və BMT-nin İnkişaf Proqramının icra etdiyi “Cənubi Qafqazda Narkotiklərə Nəzarət” (SKAD) regional yardım proqramının 5-ci mərhələsi icra olunmaqdadır.
AZƏRTAC xəbər verir ki, iyulun 10-11-də “Delfin” hotelində proqramın beynəlxalq eksperti Heino Stoverin iştirakı ilə “Narkotiklərdən istifadə edənlərin müalicəyə cəlb olunması və reabilitasiya üsulları” mövzusunda təlim keçiriləcəkdir.
Təlimin keçirilməsinin əsas məqsədi Səhiyyə və Ədliyyə nazirliklərinin bu sahə üzrə mütəxəssislərini narkotiklərdən istifadə edən şəxslərə göstərilən müalicə və reabilitasiya xidmətində yeni yanaşmalar, eləcə də Avropa ölkələrinin qabaqcıl təcrübəsinə əsaslanan penitensiar sistemdə narkotik aludəçilərinə göstərilən tibbi xidmətin müasir üsulları ilə tanış etməkdir.
SKAD Proqramı rəhbərliyinin, Dövlət Komissiyasının işçi qrupunun, Səhiyyə və Ədliyyə nazirlikləri əməkdaşlarının və QHT nümayəndələrinin iştirakı ilə keçiriləcək tədbirin sonunda sertifikatlar təqdim olunacaqdır.
