BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, oktyabrın 21-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə, bostan və tərəvəz məhsulları çıxarılmışdır.
Nəsimi rayonunda yerləşən “Təzə bazar” MMC-nin həyətindəki yarmarkada alıcılara Sabirabad, Salyan, Gədəbəy, Tovuz, Hacıqabul və digər rayonların fermerlərinin gətirdikləri məhsullar bazardakından xeyli ucuz qiymətə satılırdı. Gədəbəy rayonunun Novosaratovka kəndindən Kamran Əliyev satışa 500 kiloqram məhsul çıxarmışdı. O, kartofun kiloqramını 50-60, soğanı 30 qəpiyə təklif edirdi. Qəbələnin Tüntün kəndindən Mürvət Mürsəlov armudun kiloqramını 80 qəpiyə-1 manata, heyvanı 60-70, almanı 60-80 qəpiyə, qozu 2 manata satırdı.
Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev bildirdi ki, bazar günü burada əhaliyə 13,7 ton məhsul, o cümlədən 2,6 ton ət, 7 ton tərəvəz, 1 ton meyvə, 3 ton kartof 10 min ədəd yumurta və s. təklif edilmişdir. Şənbə və bazar günləri bu yarmarkada paytaxt sakinlərinə 35,1 ton məhsul satılmışdır.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada cəlilabadlı fermerlər alıcılara 5 tona qədər müxtəlif çeşidli kənd təsərrüfatı məhsulları təklif etmişlər.
Kənd Təsərrüfatı Nazirliyinin nümayəndəsi Mustafa Rüstəmov bildirmişdir ki, Suraxanıda “Günəş” ticarət mərkəzindəki yarmarkada isə Qobustan, Balakən, Samux, Daşkəsən, Cəlilabad, Salyan və Biləsuvar rayonlarının fermerləri şənbə və bazar günləri satışa 50 tona yaxın məhsul çıxarmışlar.
Metronun “Əhmədli” stansiyasının yaxınlığında, “Bülbülə” kiçik müəssisəsinin “Azər” ticarət mərkəzindəki yarmarkada, işçi qrupunun qərargahından verilən məlumata görə, şənbə və bazar günləri Salyan, Kürdəmir, Quba, Şəmkir, Ağcabədi, Biləsuvar, Qax, Qəbələ və Şəki rayonlarından gətirilmiş 15,6 ton ət, 41 ton kartof, 62 ton meyvə, 85,1 ton tərəvəz və digər məhsullar satılmışdır. Hövsan fermerlərinin yarmarkaya gətirdikləri toyuq ətinin alıcıları daha çox olmuşdur.
Kənd Təsərrüfatı Nazirliyinin təmsilçiləri, Xətai rayonunun və məhsul gətirmiş rayonların icra hakimiyyətlərinin nümayəndələri ərazidə alıcılar və satıcılarla söhbət edir, növbəti yarmarkaların təşkili ilə əlaqədar onların rəy və təkliflərini öyrənirdilər
Binəqədi rayonu ərazisində 6 nömrəli Bakı Texniki Peşə Liseyinin qarşısındakı yarmarkaya, Kənd Təsərrüfatı Nazirliyinin nümayəndəsi Sabir Əhədovun verdiyi məlumata görə, şənbə və bazar günləri Ağstafa, Bərdə və Goranboy rayonlarının fermerləri 30 ton məhsul gətirmişlər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada isə şəhər sakinlərinə Ağsu və Qazax rayonlarından gətirilmiş 6 ton kartof, 2,5 ton soğan, 1,5 ton xiyar və digər kənd təsərrüfatı məhsulları təklif olunmuşdur. Burada soğanın kiloqramı 22, pomidor 50-60, kartof 40 qəpiyə satılmışdır.
Şəhər sakinləri yarmarkada bazarlıq etməyin onlar üçün çox əlverişli olduğunu bildirmişlər.
Kənd Təsərrüfatı Nazirliyinin nümayəndəsi Fərhad Eminov Nərimanov rayonundakı Keşlə ticarət mərkəzində təşkil olunmuş yarmarkada şənbə və bazar günləri şəhər sakinlərinə Xaçmaz, İmişli, Tovuz, Astara, Salyan, Neftçala, Oğuz və Qobustan rayonlarından gətirilmiş 100 tona yaxın meyvə-tərəvəz və digər məhsullar satıldığını demişdir.
Bölmənin digər xəbərləri
