BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, noyabrın 17-də Bakı şəhərinin 7 rayonunda əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq, əsasən meyvə, bostan və tərəvəz məhsulları çıxarılmışdı.
“Təzə bazar” MMC-nin həyətindəki yarmarkada paytaxt sakinlərinə Sabirabad, Salyan, Gədəbəy, Tovuz, Hacıqabul və digər rayonlardan gətirilmiş geniş çeşiddə kənd təsərrüfatı məhsulları təklif olunurdu.
Pensiyaçılar Hacı Həşimov, Ramiz Əliyev, evdar qadın Qənirə Qurbanova və başqaları təzə, keyfiyyətli məhsulların bazarlardakından xeyli ucuz olduğuna görə yarmarkanın təşkilatçılarına, fermerlərə minnətdarlıq edirdilər.
Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, şənbə günü paytaxt sakinlərinə 25,3 ton məhsul, o cümlədən 3 ton ət, 0,3 ton ağartı, 10 ton tərəvəz, 4 ton kartof, 8 ton meyvə, 10 min ədəd yumurta təklif olunmuşdur.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada satışa Salyan, Qusar, Dəvəçi, Astara və digər rayonlardan 67 tondan çox müxtəlif çeşidli kənd təsərrüfatı məhsulları çıxarılmışdı.
İlk dəfədir Astaradan yarmarkaya gəlmiş Rakif Qurbanov 3 tondan çox naringi gətirmişdi. Fermer burada yaradılmış şəraitdən razılıq edirdi. Əraziyə nəzarət edən Kənd Təsərrüfatı Nazirliyinin nümayəndələri bildirdilər ki, məhsulların qiyməti bazardakından 40-50 faiz aşağıdır.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Saatlı, Salyan, Ağdaş, Masallı və başqa rayonlardan 19 tona yaxın məhsul gətirilmişdi.
Masallıdan gəlmiş Qurban Məmmədov bildirdi ki, iki ildir hər həftə ardıcıl olaraq buraya tərəvəz gətirir. İndiyədək 20 tondan çox məhsul satmışdır. Ağdaş rayonundan yarmarkaya nar, alma, heyva, xurma, üzüm gətirmiş Füzuli Lazımov bu məhsulları bazardakından xeyli ucuz satırdı.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində təşkil edilmiş yarmarkada şəhər əhalisinə nar, heyva, alma, xurma, arıçılıq, heyvandarlıq məhsulları təklif olunurdu.
İşçi qrupunun qərargahından verilən məlumata görə, bu gün Salyan, Kürdəmir, Quba, Şəmkir, Ağcabədi, Qax və Biləsuvar rayonlarından yarmarkaya 201,7 ton kənd təsərrüfatı məhsulları gətirilmişdir.
Yarmarkada vəziyyətlə tanış olmaq üçün buraya gəlmiş kənd təsərrüfatı naziri İsmət Abasov jurnalistlərdən xahiş edirdi ki, məhsulların çeşidi və keyfiyyətinə fikir versinlər, alıcıların rəylərini öyrənsinlər. Nazir özü də alıcılar və satıcılarla söhbət edir, onların fikirlərini diqqətlə dinləyirdi.
İsmət Abasov kütləvi informasiya vasitələri nümayəndələrinə məlumat vermişdir ki, ötən ilin iyulundan Prezident İlham Əliyevin tapşırığı ilə bu günə qədər paytaxtda 143 yarmarka keçirilmişdir. Yarmarkaların təşkilindən həm alıcılar, həm də satıcılar razılıq edirlər. Başlıca məqsədimiz yarmarkaların davamlı olmasını təmin etməkdir. Çünki aztəminatlı ailələr bu yarmarkalardan kifayət qədər istifadə edirlər. Mütəxəssislərimizin araşdırmaları göstərir ki, buradakı qiymətlər bazarlardakından 30-40 faiz, bəzən isə 50 faiz aşağı olur. Müşahidələrə görə, yarmarkalar keçirilən günlər bazarlarda alver azalır. Bədxahlar bir müddət taxıl böhranı barədə şayiə yaymışdılar. Gördünüz ki, heç bir böhran olmadı. İndi də toyuq əti barəsində belə şayiələr yayılır. Yarmarkalarda toyuq ətinin bolluğu bu əsassız söz-söhbətə tutarlı cavabdır.
Nazir növbəyə dayanıb alma alandan sonra yarmarkanı tərk etdi.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısında təşkil olunmuş yarmarkaya Qazax və Ağsu rayonlarının fermerləri gətirdikləri təzə meyvə-tərəvəz və heyvandarlıq məhsullarını şəhər sakinlərinə sərfəli qiymətlərə təklif edirdilər.
Qazax Rayon İcra Hakimiyyətinin nümayəndəsi İman Məmmədovun sözlərinə görə, bu gün yarmarkada satışa 25 tondan çox kənd təsərrüfatı məhsulları çıxarılmışdır.
Binəqədi rayonunun 6 nömrəli Bakı Texniki Peşə liseyinin qarşısında təşkil olunmuş yarmarkada da əhaliyə ucuz qiymətə kök, kələm, çuğundur, alma, nar, xiyar, kartof və digər məhsullar satılırdı. Bərdə, Goranboy və Ağstafa rayonlarının fermerləri burada satışa 26 ton məhsul çıxarmışdılar.
Nərimanov rayonundakı Keşlə ticarət mərkəzində təşkil olunmuş yarmarkada Xaçmaz, İmişli, Tovuz, Astara, Salyan, Neftçala, Oğuz və Qobustan fermerləri bakılılara 33 adda, 88,7 ton meyvə-tərəvəz təklif edirdilər.
Tərtər Rayon İcra Hakimiyyəti başçısının müavini Ədalət Əliyev bildirmişdir ki, torpaq sahiblərimiz yarmarkalara həvəslə məhsul gətirirlər. Bu gün onlar satışa 29 ton kartof, soğan, kələm, sarımsaq, yerkökü, nar, heyva, xurma və digər məhsullar çıxarmışlar.
Yarmarkada alıcılar qiymətlərin ucuzluğundan, məhsulların keyfiyyətindən razılıq edirdilər.
Bölmənin digər xəbərləri
