BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, oktyabrın 18-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkada alıcılar Sabirabad, Zərdab, Gədəbəy və digər rayonlardan gətirilmiş 26,2 ton kənd təsərrüfatı məhsullarını, o cümlədən 2,5 ton əti, 0,3 ton ağartını, 10 ton tərəvəzi, 6 ton meyvəni, 6 ton kartofu, 10 min ədəd yumurtanı həvəslə alırdılar.
Qəbələli Mürvət Əliyev paytaxt sakinlərinə alma, armud, qoz və fındıq, gədəbəyli Arzu Tanrıquliyev bal, onun həmyerlisi Cəmil İsayev isə kartof və soğan təklif edirdilər.
Metronun “Əhmədli” stansiyasının yaxınlığında, “Azər” ticarət mərkəzində Kürdəmir, Salyan, Quba, Ağcabədi, Şəmkir, Biləsuvar və Qəbələ fermerləri satışa 278,9 ton kələm, kartof, soğan, alma, nar, qoz və digər məhsullar çıxarmışdılar. Sakinlər qiymətləri bazardakından 25-30 faiz ucuz olan meyvə-tərəvəzin, ağartının keyfiyyətindən də razılıq edirdilər.
Suraxanıda “Günəş” ticarət mərkəzindəki yarmarkada Balakən, Gədəbəy, Samux, Daşkəsən, Quba, Biləsuvar rayonlarının fermerləri alıcılara 56 tondan çox məhsul təklif edirdilər. Kənd Təsərrüfatı Nazirliyinin nümayəndəsi Mustafa Rüstəmovun dediyinə görə, yarmarkada satılan məhsulların qiyməti bazardakından 35 faizə qədər ucuzdur.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonundan gətirilmiş 10 tondan çox məhsul satılırdı.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkaya Salyan, Quba, Xaçmaz, Astara və digər rayonlardan 80 tondan çox məhsul gətirilmişdi. Astaralı Əlizamin Şirəliyev gətirdiyi 1 ton narıngi və feyxoanın kiloqramını 1 manata-1 manat 50 qəpiyə təklif edirdi. Alıcıları çox idi.
Kənd Təsərrüfatı Nazirliyinin və Yasamal Rayon İcra Hakimiyyətinin nümayəndələrindən ibarət işçi qrupundan bildirdilər ki, bu gün yarmarkaya 4 rayondan 25 çeşiddə kənd təsərrüfatı məhsulu gətirilmişdir.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Salyan, Ağdaş, Sabirabad və digər rayonlardan gətirilmiş 22 tondan çox məhsul satılmışdır.
Ağdaş Rayon İcra Hakimiyyəti nüməyəndələrinin sözlərinə görə, Aralbir, Teymur, Orta Ləki, Kotanarx kəndlərinin fermerləri Bakıya 10 tona yaxın məhsul - pomidor, badımcan, müxtəlif meyvə gətirmişlər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Ağsu və Qazax rayonlarının fermerləri meyvə-tərəvəz və heyvandarlıq məhsulları satırdılar. Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, satışa 26 tonadək məhsul çıxarılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Ağstafa, Bərdə və Goranboy fermerlərinin ucuz qiymətlərə satdıqları kənd təsərrüfatı məhsulları da həvəslə alınırdı.
Nərimanov rayonunun Ə.Əliyev küçəsindəki yarmarkaya Xaçmaz, İmişli, Tərtər, Tovuz, Oğuz, Astara rayonlarının fermerləri 49,8 ton məhsul gətirmişdilər. Tovuzlu Mənzərə Rəhimova öz şəxsi təsərrüfatında becərdiyi 6 ton kartofu paytaxt sakinlərinə münasib qiymətə təklif edirdi. Dediyinə görə, artıq alıcıların əksəriyyəti ilə tanışdır, onların istədiyi məhsulu gətirməyə çalışır.
######
Bölmənin digər xəbərləri
