BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 6 iyul (AZƏRTAC). İyulun 5-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarının fermerləri alıcılara ərik, gilas, gilənar, badımcan, kartof, soğan, mal və qoyun əti təklif edirdilər. Kənd Təsərrüfatı Nazirliyinin nümayəndəsi Namiq Qüdrətov bildirmişdir ki, yarmarkada alıcıların arzu və təklifləri, onların hansı məhsula daha çox tələbatı olduğu öyrənilir və növbəti tədbirdə həmin məhsulun həcmi artırılır. Şənbə və bazar günləri satışa 240 tona yaxın meyvə-tərəvəz və digər kənd təsərrüfatı məhsulları çıxarılmışdır.
Bazar günü Bakı Rabitə və Nəqliyyat Kollecinin həyətində təşkil olunan yarmarkada qələbəlik idi. Kənd Təsərrüfatı Nazirliyinin nümayəndəsi Vahid Zərgərov alıcıların çoxluğunu qiymətlərin bazarlara nisbətən xeyli ucuzluğu ilə əlaqələndirdi. Bildirdi ki, burada qiymətlər bazardakından ən azı 30-40 faiz ucuzdur. Məhz bunun nəticəsidir ki, Salyan, Quba, Dəvəçi, Qusar, Astara və digər rayonların fermerləri və şəxsi təsərrüfat sahibləri bir gün əvvəl yarmarkaya gətirdikləri 64,5 ton müxtəlif çeşidli məhsulun əksər hissəsini artıq satıb qurtarmışlar.
Alıcılara təklif olunan kənd təsərrüfatı məhsulları arasında kartof, soğan, pomidor, lobya, badımcan, xiyar, kələm, yerkökü, alça, ərik, gavalı, ağartı məhsulları, göyərti, eləcə də Quba rayonundan gətirilmiş mürəbbəlik ağ gilas çoxluq təşkil edirdi.
Suraxanıda “Günəş” ticarət mərkəzindəki yarmarkada Samux, Daşkəsən, Quba, Biləsuvar, Balakən və digər rayonlardan 54 ton 700 kiloqram məhsul gətirilmişdi. Məhsullar arasında kartof, soğan, yerkökü, kələm, göyərti, balqabaq, ət və süd məhsulları, xiyar, badımcan, alma, pomidor, lobya, alça, çiyələk, gilas, şaftalı, gavalı və digər məhsullar çoxluq təşkil etmişdir.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada Cəlilabad rayonunun fermerləri sakinlərə 10 ton 600 kiloqram məhsul satmışlar.
Kənd Təsərrüfatı Nazirliyinin nümayəndəsi Mustafa Rüstəmov bildirmişdir ki, hər iki yarmarkada məhsulların keyfiyyəti ciddi surətdə yoxlanılmış, xüsusilə ət məhsulları baytar müayinəsindən keçirilmişdir.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Ağsu və Qazax rayonlarından gətirilmiş müxtəlif çeşiddə meyvə-tərəvəz diqqəti cəlb edirdi. Burada sakinlər istədikləri məhsulları ucuz qiymətə ala bilirdilər. Kənd Təsərrüfatı Nazirliyinin nümayəndəsi Qalib Hacızadə bildirdi ki, şənbə və bazar günləri yarmarkada 19 tondan çox meyvə-tərəvəz satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Goranboy, Ağstafa və Bərdə fermerləri alıcılara badımcan, kartof, kələm, lobya və digər məhsullar təklif edirdilər.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada satışa Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 32,2 ton meyvə-tərəvəzin şənbə günü satılmayan hissəsi çıxarılmışdı. Alıcılara Giləzi və Goradil broyler fabriklərindən gətirilmiş 20 min yumurta da təklif edilirdi.
Yarmarkada soğanın kiloqramı 30 qəpiyə, kartof və kələm 40 qəpiyə, pomidor 80 qəpiyə, gilas 1 manat 20 qəpiyə , ərik 1 manat 50 qəpiyə, lobya 70 qəpiyə, mal əti 4 manata, qoyun əti isə 4 manat 50 qəpiyə satılırdı.
Nərimanov Rayon İcra Hakimiyyətinin və Kənd Təsərrüfatı Nazirliyinin əməkdaşları yarmarkada məhsulun keyfiyyətinə və qiymətinə nəzarət edirdilər.
######
Bölmənin digər xəbərləri
