BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI TƏŞKİL OLUNMUŞDUR
AZƏRTAC xəbər verir ki, iyulun 6-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə təşkil olunan yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərov bildirmişdir ki, bazar günü yarmarkaya 18,33 ton məhsul, o cümlədən 1,5 ton ət, 0,3 ton ağartı, 6 ton tərəvəz, 3 ton kartof, 3 ton bostan məhsulları, 4,5 ton meyvə, 7 min ədəd yumurta, 30 kiloqram bal gətirilmişdi. Burada qiymətlər bazardakından 20-25 faiz aşağı olmuşdur.
Yarmarkada qoyun ətinin kiloqramı 4 manat 50, mal əti 4 manat 20 qəpiyə, quş əti 3 manat 80-4 manat 20 qəpiyə, bal 9-10 manata, alma 50 qəpik-1 manata, armud 40 qəpik-1 manata, çuğundur, yerkökü, kələm 60 qəpiyə, badımcan 50, pomidor, lobya 40-50, kartof, soğan 30-40, qarpız 20, yemiş 50-60, yumurtanın bir ədədi 10, göyərtinin dəstəsi 10-15 qəpiyə satılmışdır.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində təşkil olunmuş yarmarkada satışa təzə kənd təsərrüfatı məhsulları çıxarılmışdı.
Alıcılar onlara təklif olunan kartofun, badımcanın, xiyarın, gilasın, soğanın, lobyanın, bibərin, pomidorun, digər meyvə-tərəvəzin və süd məhsullarının qiymətlərinin bazardakından xeyli ucuz olduğunu söyləyirdilər.
Kənd Təsərrüfatı Nazirliyinin nümayəndəsi Namiq Qüdrətov bildirmişdir ki, şənbə və bazar günləri Quba, Salyan, Şəmkir, Kürdəmir, Biləsuvar, Qəbələ, Ağcabədi və digər rayonların fermerləri yarmarkada alıcılara 265 tonadək məhsul təklif etmişlər.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermerləri iki gün ərzində 35 tondan çox məhsul satmışlar.
Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə, yarmarkada satılan məhsulların qiyməti bazardakından 20-35 faiz ucuz olmuşdur.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri şənbə və bazar günü alıcılara bazardakından 20-25 faiz ucuz qiymətlərə 5 tondan çox məhsul təklif etmişlər.
Biləcəri qəsəbəsi, Məlik Aslanov küçəsində yerləşən 284 nömrəli orta məktəbin qarşısındakı yarmarkada Qazax Rayon İcra Hakimiyyətinin nümayəndəsi İman Məmmədov bildirmişdir ki, rayonun fermerləri satışa 7,8 ton tərəvəz, 1 tonadək meyvə və digər məhsullar çıxarmışlar.
Burada kələmin kiloqramı 40, qarpızın kiloqramı 10, badımcanın kiloqramı 25-30, əriyin kiloqramı 60-80, kartofun kiloqramı 30 qəpiyə təklif olunmuşdur.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, şənbə və bazar günləri Ağsu və Qazax fermerləri yarmarkada 26 tonadək meyvə-tərəvəz və süd məhsulları satmışlar.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada satışa müxtəlif çeşidli 15 tonadək kənd təsərrüfatı məhsulları çıxarılmışdı. Burada Bərdə, Goranboy və Ağstafa fermerləri həmin məhsulları bazarlardakından 30-40 faiz ucuz qiymətlərə təklif etmişlər.
######
 |
 |
Bölmənin digər xəbərləri
