MƏDƏNİYYƏT
Bakıda Liditse uşaqlarının rəsm əsərlərinin Beynəlxalq sərgisinin qaliblərinə mükafatlar təqdim edilmişdir
Bakı, 30 oktyabr (AZƏRTAC). Oktyabrın 30-da Çex Respublikasının Bakıdakı səfirliyində 41-ci Liditse uşaqlarının rəsm əsərlərinin Beynəlxalq sərgisinin qalibi olmuş gənc Azərbaycan rəssamlarına mükafat və hədiyyələrin təqdim edilməsi mərasimi keçirilmişdir.
Səfirliyin mətbuat xidmətindən AZƏRTAC-a bildirmişlər ki, sərgini hər il Çex Respublikasının Mədəniyyət, Təhsil, Gənclər və Bədən Tərbiyəsi nazirliklərinin və UNESCO-nun Çex Respublikası üzrə Komissiyasının dəstəyi ilə Liditse Memorialı təşkil edir.
Liditsedə uşaq rəsm əsərlərinin Beynəlxalq sərgisi 1942-ci ildə Liditse kəndində faşistlər tərəfindən qətlə yetirilmiş, habelə hərbi münaqişələrdə həlak olmuş uşaqların xatirəsinə 1967-ci ildə təsis edilmişdir.
Bu sərgi təkcə Çex Respublikasında deyil, həm də bütün dünyada uzunmüddətli ənənəyə çevrilmiş müsabiqədir. Sərgidə müxtəlif tipli məktəblərin 4-16 yaşlı şagirdləri iştirak edirlər.
Hər il “ilin mövzusu” elan edilir. Uşaqlara yaxın olan, onların dünyasına hakim kəsilən, onları sevindirən və kədərləndirən hər şey - onların maraqları, arzu və istəkləri, yaşadıqları mühit - məktəb, ailə, dostları və oyunlar sərginin əsas mövzularıdır.
Son illər sərgiyə 60-70 ölkədən təqribən 25.000 rəsm əsəri qəbul edilir. Peşəkar münsiflər heyətinin seçdiyi ən uğurlu rəsm əsərləri diplom, fəxri fərman və “Liditsa qızılgülü” memorial medalı ilə təltif olunur.
Mükafatlandırma mərasimi Liditse Memorialının Liditse Qalereyasında keçirilir. Əsas sərgi başa çatandan sonra ekspozisiya Çex Respublikasının və xarici ölkələrin sərgi salonlarında və qalereyalarında nümayiş etdirilir.
2013-cü ildə xalq sənətlərinin, ayinlərinin, ənənəvi xalq biliklərinin - Qeyri-maddi mədəni irsin qorunması haqqında Konvensiyanın müdafiəsi haqqında Ümumdünya sazişinin 10 ili tamam olur. Bu münasibətlə UNESCO-nun Çex Respublikası üzrə komissiyası uşaq rəsmlərinin 41-ci Beynəlxalq sərgisi üçün “Ölkəmin xalqının ənənələri və irsi” mövzusunu təklif etmişdir. Ölkəmin ənənəvi geyimi, ölkəmdə sənətkarların yaratdıqları gözəl şeylər, rəqslər, kənd toyları, xalqın adət-ənənələri və ayinləri və s. sərginin yarımmövzularıdır.
Azərbaycanda gənc rəssamların Liditse uşaqlarının Beynəlxalq rəsm əsərləri sərgisinə marağı çox böyükdür. Münsiflər heyəti qeydiyyata alınmış 387 azərbaycanlı iştirakçının beş nəfərini rəsm, rəngkarlıq kateqoriyasında mükafatlara, o cümlədən 4-ünü fəxri fərmana, 1 nəfərini “Liditse qızılgülü” medalına layiq görmüşdür.
Çex Respublikasının Azərbaycandakı səfiri Radek Matula tədbirdə çıxış edərək demişdir ki, “Ölkəmin xalqının ənənələri və irsi” mövzusu Azərbaycan üçün ən münasib mövzulardan biri olmuşdur, çünki Azərbaycan zəngin tarixə və ənənələrə malik ölkədir. O bildirmişdir ki, uşaqların yaradıcılıq nailiyyətlərində müəllimlərinin rolu böyükdür. Səfir şagirdlərin rəssamlıq istedadını inkişaf etdirməyə çalışan valideynləri də təbrik etmişdir.
42-ci sərgi-müsabiqənin mövzusu “Ailəvi əkinçilik və ya bizim bağ və çöl”dür.
Aşağıda müsabiqənin Azərbaycandan olan qaliblərinin siyahısını təqdim edirik:
Rəna Abdullayeva (10 yaş) - Children's Art School, Saray.
Rəsm rəngkarlıq kateqoriyasında “Liditse qızılgülü” medalı ilə təltif edilmişdir.
Nigar Müslümova (13 yaş) - Centre of Russian Culture, Bakı.
Rəsm rəngkarlıq kateqoriyasında fəxri fərmanla təltif edilmişdir.
Elvinə Nəbiyeva (15 yaş) - Creative Center for Children and Teenagers, Bakı.
Rəsm rəngkarlıq kateqoriyasında fəxri fərmana layiq görülmüşdür.
Adil Baxşəliyev (11 yaş) The City Centre of work of the 46 non-school. Sun drawing studio, Bakı.
Rəsm rəngkarlıq kateqoriyasında fəxri fərmanla təltif edilmişdir.
Rəhman Əliyev (13 yaş) - Guba Child Art Schoul, Quba.
Rəsm rəngkarlıq kateqoriyasında fəxri fərmana layiq görülmüşdür.