BAKIDA MDB ÖLKƏLƏRİNİN HİDROMETEOROLOGİYA ÜZRƏ DÖVLƏTLƏRARASI ŞURASININ SESSİYASI İŞƏ BAŞLAMIŞDIR
Azərbaycanın ekologiya və təbii sərvətlər naziri Hüseynqulu Bağırov sessiyanı açaraq bildirdi ki, hazırda hidrometeorologiya fəaliyyəti xüsusi aktuallıq kəsb edir. Enerjidən həddindən artıq istifadə edilməsi və meşələrin qırılması XXI əsrin əsas problemlərindən biri olan qlobal iqlim dəyişikliyi təhlükəsi yaradır. Bu, kortəbii hidrometeoroloji halların sayının artmasına gətirib çıxara bilər və dövlətin sabit inkişafı ücün risk amilidir.
Kortəbii hidrometeoroloji halların vaxtının dəqiq müəyyənləşdirilməsi hidrometeorologiya xidmətinin əsas vəzifələrindən biridir. Nazir dedi ki, HDŞ-nin Almatıda keçirilən 14-cü sessiyasında təklif olunmuş “MDB ölkələrinin hidrometeoroloji təhlükəsizliyi konsepsiyası” diqqətəlayiqdir. Bu sənəddə hidrometeoroloji təhlükəsizlik ölkələrin ümummilli təhlükəsizliyinin ayrılmaz hissəsi kimi şərh olunur.
Hüseynqulu Bağırov Azərbaycanda bu istiqamətdə görülən işlərdən danışaraq bildirdi ki, nazirlik “2004-2010-cu illərdə Azərbaycan Respublikasında hidrometeorologiyanın inkişafı” dövlət proqramını hazırlamış və təsdiq olunmaq üçün hökumətə təqdim etmişdir.
Həmin proqrama əsasən, yaxın gələcəkdə meteoroloji müşahidə şəbəkəsinin bərpası və modernləşdirilməsi, mexaniki cihazların və avadanlığın yeni avtomatlaşdırılmış sistemlərlə əvəz edilməsi, təkmilləşdirilmiş yeni proqnozlaşdırma sistemindən, o cümlədən radiolokasiya sistemindən istifadə olunmaqla erkən xəbərdarlıq sisteminin tətbiq edilməsi nəzərdə tutulmuşdur. Bütün bunlar dövlət orqanlarının, əhalinin və KİV-lərin hidrometeoroloji xidmətə olan tələbatını keyfiyyətcə yeni səviyyədə ödəməyə imkan verəcəkdir. Altı illik fasilədən sonra Maştağa aeroloji stansiyası əsaslı təmir olunmuş, bərpa edilmiş və modernləşdirilmiş, radiozondların müntəzəm buraxılışı başlanmışdır.
Nazir bildirdi ki, Azərbaycan ərazisinin xeyli hissəsini, o cümlədən Sərsəng su anbarının yerləşdiyi Ağdərə rayonunu işğal etmiş Ermənistan silahlı birləşmələrinin təcavüzü nəticəsində oraya yaxın rayonları qış aylarında su basır, bu da kənd təsərrüfatında böyük itkilərə və infrastrukturun dağılmasına gətirib çıxarır. Ağstafaçaya da böyük ziyan vurulur. Ermənistan ərazisində bu çaya külli miqdarda zəhərli maddə tökülür.
Prezidentin İcra Aparatının humanitar siyasət şöbəsinin müdiri Fatma Abdullazadə Azərbaycan Prezidenti İlham Əliyevin sessiya iştirakçılarına təbrik məktubunu oxudu.
Baş nazirin birinci müavini Abbas Abbasov, Dünya Meteorologiya Xidmətinin prezidenti Aleksandr Bedritski də sessiyada çıxış etdilər.
Sessiyada MDB ölkələri milli hidrometeorologiya xidmətlərinin, yerüstü müşahidə xidmətinin fəaliyyəti, elmi tədqiqat və elmi-metodiki işlər, informasiya məlumatları bankının yaradılması məsələləri nəzərdən keçiriləcək və təhlil olunacaqdır.
Bölmənin digər xəbərləri
