BALAKƏNDƏ QARĞIDALI ƏKİNİNƏ MARAQ ARTMIŞDIR
Balakən rayonunun təsərrüfatlarında qarğıdalı yığımına başlanılmışdır. Cari ildə rayonda 4.992 hektar sahədə qarğıdalı əkilmişdir. Bu, ötən illə müqayisədə 499 hektar çoxdur. İndiyədək 1.597 hektar sahənin məhsulu yığılmış, 6.457 ton qarğıdalı tədarük olunmuşdur. Bu, keçən ilin müvafiq dövrü ilə müqayisədə 3.955 ton çoxdur. Hər hektarın orta məhsuldarlığı 40,4 sentner təşkil edir.
İcra hakimiyyətinin aqrar məsələlər şöbəsindən AZƏRTAC-a bildirmişlər ki, bu il rayonda qarğıdalı istehsalının 20 min tona çatacağı gözlənilir. 2007-ci ildə isə rayonda 13 min 889 ton qarğıdalı istehsal olunmuşdur. Balakəndə “Azər Yem Sənaye” MMC-nin yem istehsalı zavodunun tikintisi fermerlərin bu sahəyə marağını daha da artırmışdır.
Bölmənin digər xəbərləri
