BƏRDƏDƏ REGİONAL İNFORMASİYA MƏSLƏHƏT MƏRKƏZİ AÇILMIŞDIR
AZƏRTAC xəbər verir ki, Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi Bərdə Regional Məsləhət Mərkəzinin açılışı olmuşdur.
Kənd Təsərrüfatı Kreditləri üzrə Dövlət Agentliyinin İnformasiya Məsləhət Mərkəzinin direktoru İsa Əhmədov bildirmişdir ki, 2000-ci ildən başlayaraq Dünya bankının maliyyə dəstəyi ilə kənd təsərrüfatının inkişafı və kreditləşməsi layihəsi çərçivəsində beynəlxalq tələblərə cavab verən informasiya və məsləhət xidməti mərkəzləri yaradılmağa başlanılmışdır. Layihənin I mərhələsində respublikanın 31 inzibati rayonunu əhatə edən 5 regional məsləhət mərkəzləri yaradılmışdır. Layihənin 2007-ci ildən başlayan II mərhələsində Xaçmaz, Göyçay və Bərdə regional mərkəzləri açılmışdır.
Bərdə Regional Mərkəzi Ağdam, Bərdə, Tərtər, Goranboy və Yevlax rayonlarını əhatə edir. Bu rayonlarda 74 min 610 nəfər torpaq mülkiyyətçisinə 17 məsləhətçi informasiya və məsləhət xidməti göstərəcəkdir.
Layihənin uğurla həyata keçirildiyini, ailə-kəndli təsərrüfatları və digər sahibkarlar üçün faydalı olduğunu deyən İ.Əhmədov qeyd etmişdir ki, oktyabr ayına qədər Salyan və Şamaxıda da regional məsləhət mərkəzlərinin açılması nəzərdə tutulur.
Bölmənin digər xəbərləri
