BERTİ FOQTS: AZƏRBAYCAN YIĞMASINI MƏĞLUB ETMƏK ASAN OLMAYACAQ
“Azərbaycan yığması üzərində qələbə qazanmaq üçün rəqib komandalar artıq çox çalışmalı olacaqlar”. AZƏRTAC xəbər verir ki, bunu avqustun 29-da Azərbaycan yığma futbol komandasının baş məşqçisi Berti Foqts dünya çempionatının qrup seçmə oyunları ərəfəsində yetirmələrinin yeni mövsümə hazırlığı ilə AFFA-da keçirdiyi mətbuat konfransında bildirmişdir.
Futbolçuların məşqlərdə çox çalışdığını vurğulayan B.Foqts komandanın fiziki hazırlığının hələ də ideal səviyyədə olmadığını demişdir. İslandiya və İran yığmaları ilə yoldaşlıq görüşlərində futbolçuların hazırlığını yoxlayan mütəxəssis bildirmişdir ki, ilk növbədə bu görüşlərdə mən bir neçə yeni futbolçunu sınamaq imkanı qazandım.
Azərbaycan yığmasının düzgün yolda olduğunu deyən B.Foqts komandasının qarşıdakı oyunlarda layiqli oyun göstərəcəyinə ümid etdiyini bildirmişdir.
Dünya çempionatının seçmə mərhələsi çərçivəsində sentyabrın 6-da Uels komandası ilə görüşə toxunan almaniyalı mütəxəssis rəqibin çox güclü olduğunu söyləmişdir. “Uels yığmasında oynayan futbolçuların böyük əksəriyyəti İngiltərə Premyer Liqasında çıxış edir. Amma əgər biz səhv etməsək, hesab edirəm ki, rəqibə uduzmarıq. Ümid edirəm ki, Uelsə bizim gücümüz çatar”.
Bölmənin digər xəbərləri
