BEŞ TURİZM ŞİRKƏTİNƏ LİSENZİYA VERİLMİŞDİR
Son iki həftə ərzində daha beş turizm şirkəti fəaliyyət göstərmək üçün Gənclər, İdman və Turizm Nazirliyinin lisenziyasını almışdır. Baş Turizm İdarəsində AZƏRTAC-ın müxbirinə bildirmişlər ki, təzə qeydə alınmış turizm operatorlarının hamısının - “Elvin”, “Asiman”, “Abşeron-tur”, “Füzuli”, “İnterOPA turizm və səyahət LTD Azərbaycan”ın ofisləri paytaxtda yerləşir. Lakin respublikanın regionlarında da yerli sahibkarlar turizm biznesinə böyük maraq göstərirlər. Məsələn, idarənin məlumatına görə, son iki ildə turizm sahəsi ilə məşğul olan firmaların sayı 4 dəfə artmışdır. Hazırda ölkədə 91 turizm şirkəti fəaliyyət göstərir. Beş il müddətinə nəzərdə tutulmuş lisenziyanın dəyəri 2 milyon 750 min manatdır.
