Beynəlxalq ekspertlər Azərbaycanda heyvan sağlamlığı sahəsində görülən işləri müsbət qiymətləndiriblər
Bakı, 12 noyabr, AZƏRTAC
Noyabrın 12-də BMT-nin Ərzaq və Kənd Təsərrüfatı Təşkilatının (FAO) Texniki Əməkdaşlıq Proqramı çərçivəsində FAO Baş Qərargahının eksperti Susanne Munstermannın iştirakı ilə mətbuat konfransı keçirilib.
AZƏRTAC-ın məlumatına görə, Azərbaycan Respublikasının Qida Təhlükəsizliyi Agentliyində keçirilən mətbuat konfransında bildirilib ki, beynəlxalq ekspertlərin ölkəmizə səfəri çərçivəsində Azərbaycanda xırdabuynuzlu heyvanlar arasında taun xəstəliyindən azad olunması ilə bağlı görülən işlər, Azərbaycan hökuməti tərəfindən hazırlanan müvafiq sənədlərin tamamlanmasına texniki dəstəyin göstərilməsi nəzərdə tutulur.
Son illərdə Qida Təhlükəsizliyi Agentliyi tərəfindən heyvan sağlamlığının təmin olunması istiqamətində görülən məqsədyönlü tədbirlərdən danışan agentliyin şöbə müdiri, respublikanın baş dövlət baytarlıq müfəttişi Qalib Əbdüləliyev heyvan xəstəliklərindən azad zonanın yaradılması ilə bağlı bir sıra vacib işlərin görüldüyünü və hazırda bu sahədə tədbirlərin sürətlə davam etdirildiyini diqqətə çatdırıb. Qeyd edib ki, agentlik əməkdaşları beynəlxalq ekspertlərlə birgə ölkə ərazisində epizootoloji və seroloji monitorinqlər keçirib və məlumatlar toplanaraq zəruri tədbirlər görülüb.
Baş dövlət baytarlıq müfəttişinin dediyinə görə, Azərbaycan qoyunçuluğun inkişaf etdirilməsi üçün əlverişli ölkədir. Bu sahənin inkişafından söhbət gedəndə heç də təkcə ət və süd nəzərdə tutulmur, bura həm də xammal kimi istifadə olunan gön, dəri, yun və s. məhsullar da aiddir: “Ümid edirik ki, heyvan xəstəliklərinə mütərəqqi nəzarət xəstəliyin baş verməməsinə və nəticədə istehsalın artmasına, ərzaq bolluğunun yaranmasına səbəb olacaq. Respublikamızda yun və dərinin çox böyük ixracat potensialı var və həmin məhsulların Avropa bazarlarına çıxarılması üçün də lazımi tədbirlər görülüb”.
Mətbuat konfransında məlumat verilib ki, Ümumdünya Heyvan Sağlamlığı Təşkilatının (OIE) qaydalarına əsasən, beynəlxalq ticarət şəbəkəsi vasitəsilə diri heyvanlar və heyvan mənşəli məhsulların dövriyyəsinin təmin olunması üçün ölkəmiz bir sıra heyvan xəstəliklərindən azad statusa malik olmalıdır. Həmin xəstəliklərdən biri də xırdabuynuzlu heyvanların taunu xəstəliyidir. Ölkələr ərazisinin xırdabuynuzlu heyvanların taunu xəstəliyindən azad olmasının OIE tərəfindən rəsmi tanınması və xəstəlik üçün milli nəzarət proqramının təsdiqi ilə əlaqədar müraciət etmək imkanına malikdirlər.
Qeyd edək ki, xırdabuynuzlu heyvanların taunu Birləşmiş Millətlər Təşkilatının Ərzaq və Kənd Təsərrüfatı Təşkilatının və Ümumdünya Heyvan Sağlamlığı Təşkilatının Transsərhəd Heyvan Xəstəliklərinə mütərəqqi nəzarət üzrə Qlobal Çərçivəsinin (GF-TADs) 5 illik fəaliyyət planında göstərilən prioritet xəstəliklərdən biridir və 2030-cu ilə qədər dünyada ləğv olunması nəzərdə tutulur.
Bölmənin digər xəbərləri
