BEYNƏLXALQ EPİZOOTİK BÜRO AZƏRBAYCANA YARDIM EDİR
Dövlət Baytarlıq Xidmətinin rəisi İsmayıl Həsənov Parisdə Beynəlxalq Epizootik Büronun Şərqi Avropa ölkələrində dabaq və Afrika taunu xəstəlikləri ilə bağlı məsələnin müzakirə olunduğu xüsusi görüş-iclasında iştirak etmişdir.
Qurumun mətbuat mərkəzindən AZƏRTAC-a bildirmişlər ki, müxtəlif ölkələrin baytarlıq xidmətlərinin rəhbərləri və beynəlxalq təşkilatların nümayəndələrinin iştirak etdikləri tədbirdə büronun baş direktoru B.Vallatın, Şərqi Avropa ölkələri regional komissiyasının təmsilçisi R.Steinmetzin çıxışları dinlənilmişdir. Dünyada və Şərqi Avropa ölkələrində dabaq və Afrika taunu xəstəliklərinin vəziyyəti barədə məlumat verilmişdir.
Müzakirələrdə İran, Rusiya, Qazaxıstan, Türkiyə və digər ölkələrdə dabaq xəstəliyinin baş verməsi diqqətə çatdırılmışdır. Azərbaycanda isə xəstəliyin qarşısının alınması üçün məqsədyönlü tədbirlər görüldüyü, bufer zonanın yaradıldığı xüsusi vurğulanmışdır. Bununla yanaşı, 3 il müddətinə dabaq xəstəliyinə qarşı mübarizəni gücləndirməkdən ötrü bufer zona yaratmaq üçün Azərbaycana hər il 1 milyon 720 min doza, ümumilikdə 5 milyon 160 min doza vaksin ayrılması qərara alınmışdır. Bu, 2 milyon ABŞ dolları dəyərində təmənnasız yardım deməkdir.
Bölmənin digər xəbərləri
