BEYNƏLXALQ HEYVAN SAĞLAMLIĞI TƏŞKİLATININ EKSPERTLƏRİ AZƏRBAYCANDADIR
Dövlət Baytarlıq xidmətindən AZƏRTAC-a bildirmişlər ki, sentyabrın 22-dən başlayaraq Beynəlxalq Heyvan Sağlamlığı Təşkilatının (OİE) Avropa Komissiyası Azərbaycanda baytarlıq xidmətinin beynəlxalq standartlara uyğunluq səviyyəsinin qiymətləndirilməsini həyata keçirir.
Ekspert qrupu oktyabrın 5-dək Dövlət Baytarlıq Xidmətində, ölkənin baytarlıq idarə və laboratoriyalarında, elmi tədqiqat və tədris müəssisələrində, ət kəsimi və emalı məntəqələrində, Naxçıvan MR Dövlət Baytarlıq Xidmətində olacaqlar. Ekspertlər bu müddətdə ölkədə aparılan baytarlıq tədbirləri və müayinələrinin standartlara uyğunluğu, kadr hazırlığı, maddi-texniki bazanın günün tələblərinə cavab verməsi, ölkənin biopreparatlarla təminatı, onun saxlanma şəraiti və digər məsələlərlə yaxından tanış olacaq, aparılan tədbirlərin beynəlxalq tələblərə və standartlara uyğun olub-olmadığını müəyyənləşdirəcəklər. Onların tövsiyə xarakterli araşdırmaları başa çatdıqdan sonra OİE Avropa Komissiyası üçün məlumat hazırlanacaqdır.
Bölmənin digər xəbərləri
